मुस्ताङमा पर्यटकको आकर्षण बढ्दो, १० महिनामै साढे पाँच लाखभन्दा बढी आगन्तुक

मुस्ताङ । मुस्ताङमा पर्यटन गतिविधि निरन्तर विस्तार हुँदै गएको देखिएको छ। चालु आर्थिक वर्ष २०८२/८३ को साउनदेखि वैशाखसम्मको अवधिमा पाँच लाख ७३ हजारभन्दा बढी आन्तरिक तथा विदेशी पर्यटक मुस्ताङ पुगेका छन्। हिमाली भू–दृश्य, धार्मिक आस्था र साहसिक यात्राको संगमका रूपमा विकसित हुँदै गएको मुस्ताङ पछिल्ला वर्षहरूमा नेपालकै प्रमुख पर्यटकीय गन्तव्य बन्दै गएको छ।

जिल्ला प्रहरी कार्यालयको तथ्यांकअनुसार १० महिनाको अवधिमा कुल पाँच लाख ७३ हजार ९७७ पर्यटक मुस्ताङ भित्रिएका हुन्। तीमध्ये चार लाख २० हजारभन्दा बढी नेपाली तथा एक लाख ५३ हजारभन्दा बढी विदेशी पर्यटक रहेका छन्। विदेशी आगन्तुकमध्ये भारतीय पर्यटकको संख्या अत्यधिक रहेको जनाइएको छ।

पर्यटन व्यवसायीहरूका अनुसार वसन्त र शरद ऋतुमा मुस्ताङमा पर्यटकको चहलपहल उल्लेख्य रूपमा बढ्ने गरेको छ। विशेषगरी चैत, वैशाख, असोज र कात्तिक महिनामा धार्मिक तथा प्राकृतिक पर्यटनका लागि आउनेहरूको संख्या उच्च रहने गरेको छ। वैशाख महिनामा मात्रै एक लाख पाँच हजारभन्दा बढी पर्यटक मुस्ताङ पुगेको प्रहरी अभिलेखले देखाएको छ।

मुस्ताङ भ्रमण गर्ने अधिकांश पर्यटकहरूको मुख्य आकर्षण मुक्तिनाथ मन्दिर रहेको छ। हिन्दू तथा बौद्ध धर्मावलम्बीहरूको साझा आस्थाको केन्द्र मानिने मुक्तिनाथ दर्शनका लागि भारत तथा नेपालका विभिन्न स्थानबाट पर्यटक आउने गरेका छन्। त्यस्तै कागबेनीमा श्राद्ध र तर्पण गर्ने धार्मिक परम्पराले पनि आगन्तुक बढाएको छ।

यससँगै लोमान्थाङको ऐतिहासिक बस्ती, तिब्बती संस्कृतिको प्रभाव, मरुभूमिजस्तो भू–दृश्य तथा कोरला नाकासम्मको सडक पहुँचले मुस्ताङलाई थप आकर्षक बनाइरहेको छ। पछिल्ला वर्षहरूमा सडक पूर्वाधार विस्तार भएपछि मोटरसाइकल तथा निजी सवारीमार्फत भ्रमण गर्ने आन्तरिक पर्यटकको संख्या उल्लेख्य रूपमा बढेको छ।

प्रहरी तथ्यांकअनुसार चालु आवको १० महिनामा एक लाख ३१ हजारभन्दा बढी सवारीसाधन मुस्ताङ प्रवेश गरेका छन्। यसले सडकमार्ग पर्यटनको विस्तारलाई संकेत गरेको पर्यटन व्यवसायीहरूको भनाइ छ। विशेषगरी युवा पुस्तामा “रोड ट्रिप” संस्कृतिको विस्तारसँगै मुस्ताङ लोकप्रिय गन्तव्य बनेको छ।

यद्यपि, केही अन्तर्राष्ट्रिय घटनाक्रम र आन्तरिक परिस्थितिले पर्यटन क्षेत्रमा आंशिक प्रभाव पारेको बताइन्छ। भदौ महिनातिर देखिएको युवाहरूको आन्दोलन तथा मध्यपूर्व तनावका कारण विदेशी पर्यटक आगमन केही प्रभावित भए पनि समग्र वार्षिक प्रवृत्ति भने सकारात्मक रहेको अधिकारीहरूको भनाइ छ।

गत आर्थिक वर्षमा सात लाखभन्दा बढी पर्यटक मुस्ताङ पुगेका थिए। यस वर्ष पनि पर्यटक आगमन उत्साहजनक रहेको र आगामी पर्यटकीय याममा संख्या अझ बढ्ने अपेक्षा गरिएको छ।

पर्यटनसँग सम्बन्धित सरोकारवालाहरूका अनुसार मुस्ताङको मौलिक संस्कृति, हिमाली सभ्यता, जैविक विविधता, धार्मिक महत्व र प्राकृतिक सौन्दर्यले यस क्षेत्रलाई अन्तर्राष्ट्रिय स्तरमै विशिष्ट गन्तव्यका रूपमा स्थापित गरिरहेको छ। उचित पूर्वाधार, सुरक्षित यात्रा र दिगो पर्यटन व्यवस्थापनमा ध्यान दिन सके मुस्ताङ नेपालको पर्यटन अर्थतन्त्रको बलियो आधार बन्न सक्ने विश्वास गरिएको छ।