पर्यापर्यटनबाट आम्दानी गर्दै सामुदायिक वन उपभोक्ता समूह, लाखौ खर्चेर सुविधासम्पन्न पार्क निर्माण

कास्की । सामुदायिक वनको संरक्षण गरेसँगै उपभोक्ता समूहले आन्तरिक पर्यटन लगायतका अन्य गतिविधि सञ्चालनतर्फ चासो देखाउन थालेका छन् । वन पैदावारको विकल्पका रूपमा समूहले आम्दानीका अन्य स्रोतको पहिचान गरी उपयोग गर्न सुरु गरेका हुन् ।

पोखरा महानगरपालिका–२१ स्थित वनपाले सामुदायिक वन समूहले पर्यापर्यटन प्रवर्द्धन गर्ने उद्देश्यका साथ २६ लाख रुपैयाँ लागतमा सुविधासम्पन्न मनकामना उद्यान (पार्क) निर्माण गरेको छ ।

गण्डकी प्रदेश वन, वातावरण तथा भू–संरक्षण मन्त्रालयअन्तर्गत डिभिजन वन कार्यालय कास्कीमार्फत १५ लाख  रुपैयाँ र एक लाख ६५ हजार सात सय ७४ रुपैयाँ बराबरको जनश्रम परिचालन गरी उद्यान निर्माण गरिएको वन उपभोक्ता समूहका अध्यक्ष कमल भुजेलले जानकारी दिए ।

उनका अनुसार यसअघि डिभिजन वन कार्यालय कास्कीको पाँच लाख रुपैयाँ लागतमा जग्गा सम्म्याउने र पोखरा–२१ द्वारा चार लाख रुपैयाँको खर्चमा आवश्यक ट्रस्ट भवन र शौचालय निर्माण गरिएको हो । “पार्कबाट आरोहणको पहिलो हिमाल अन्नपूर्ण, कुमारी हिमाल माछापुच्छ्रेसहित हिमशृङ्खला एवं पोखरा बजारको एकैसाथ मनोरम दृश्य देख्न सकिन्छ”, उनले भने, “पार्कमा दुईवटा चौतारासहित हरियाली प्रवर्द्धन गर्दै राष्ट्रिय झण्डा राख्ने तयारी गरिएको छ ।”

सात सयजना क्षमताको सो पार्कमा सुरक्षाका लागि फलामे पोलसहितको तारजाली लगाउनुका साथै हरियाली प्रवर्द्धन गर्न धुपीका बिरुवा रोपिएको छ भने फलामका कुर्चीसमेत राखिएको अध्यक्ष भुजेलले बताए । थप भौतिक संरचना निर्माणका लागि आर्थिक वर्ष २०८१/८२ का लागि प्रदेश सरकारबाट १५ लाख रुपैयाँ विनियोजन भएको छ ।

पोखरा महानगरपालिका–१७ स्थित पर्यटकीयस्थल छोरेपाटन हुँदै जाने सो पार्कसम्म पुग्नका लागि पक्की सडक निर्माण भएको छ भने खानेपानी, शौचालयलगायत आवश्यक संरचना निर्माण गरिएको छ ।

विशेषगरी पोखरा बजारबाट वनभोज खानका लागि सबैभन्दा नजिक र सुविधासम्पन्न एवं मनोरम दृश्यावलोकन गर्न सकिने उक्त पार्कमा प्रति समूहलाई तीन हजार पाँच सय रुपैयाँ शुल्क तोकिएको छ । प्राप्त रकमबाट  पाँच सय रुपैयाँ सरसफाइका लागि छुट्याउने र तीन हजार रुपैयाँ वन समूहको खातामा जम्मा गरिँदै आएको भुजेलले जानकारी दिए ।

यसअघि वन समूहले १० लाख लागतमा वनपाले पार्क निर्माण गरी सञ्चालन गर्दै आएको वन समूहका सचिव प्रकाश सुवेदीले बताए । विसं २०६८ मा हस्तान्तरण गरिएको ४७ दशमलव चार हेक्टर क्षेत्रफलमा फैलिएको सो वनमा एक सय १४ घरपरिवार आबद्ध छन् । समूहले वनको संरक्षण, संवर्द्धन, उपयोग गर्दै आयआर्जनका लागि वैकल्पिक आधार तयारमा जोड दिँदै आएको सुवेदी बताउँछन् । रासस