निर्वाचनको ७ महिनामै बंगलादेशको संसद भंङ्ग, नोबेल बिजेताको नेतृत्वमा सरकार बनाउने तयारी
२२ साउन, काठमाडौं । बंगलादेशका राष्ट्रपति मोहम्मद शाहबुद्दिनले संसद भङ्ग भएको घोषणा गरेका छन्। मंगलबार राष्ट्रपति कार्यालयले एक विज्ञप्ति जारी गर्दै संसद भंग भएको घोषणा गरेका हो ।
आन्दोलनमा सहभागी नेताहरूले संसद भङ्ग नगरे आन्दोलनका थप कार्यक्रमहरू घोषणा गर्ने चेतावनी दिएका थिए। २६ वर्षीय विद्यार्थी नेता नहिद इस्लामले सामाजिक सञ्जाल फेसबुकमा एक भिडिओ राख्दै मंगलबार दिउँसो ३ बजेसम्म संसद भंग गर्न माग गरेका थिए।
संसद भंग नभए थप आन्दोलनका लागि तयारी अवस्थामै रहन पनि उनले प्रदर्शनरत विद्यार्थीहरूलाई बताएका थिए। उक्त माग राखेसँगै राष्ट्रपति शाहबुद्दिनले संसद भंग गरेका हुन्। विद्यार्थी नेताहरूले आफूहरूको माग पूरा भएको फेसबुकमा लेखेका छन्।
त्यसैगरी विपक्षी दल बंगलादेश नेसनालिस्ट पार्टी (बिएनपी)की प्रमुख बेगम खालिदा जिया पनि जेलबाट छुटेको अन्तर्राष्ट्रिय समाचार संस्था एएफपीले जनाएको छ। जियालाई बंगलादेशका राष्ट्रपति शाहबुद्दिनले छाड्न पनि आदेश दिएका थिए।
७८ वर्षीया जिया दुई पटक प्रधानमन्त्री भइसकेकी छन्। उनको स्वास्थ्य अवस्था बिग्रिँदा अस्पतालमा उपचाररत छन्। सन् २०१८ मा भ्रष्टाचारको मुद्दामा उनलाई १७ वर्ष जेल सजाय सुनाएको थियो।
त्यस्तै आरक्षणविरूद्धको विद्यार्थी आन्दोलनको क्रममा पक्राउ परेका दुई हजार भन्दा बढीलाई पनि छाड्न आदेश दिएको छ।
विद्यार्थी नेताहरूले नोबल पुरस्कार बिजेता मोहम्मद युनुसको नेतृत्वमा सरकार बनाउनुपर्ने बताउँदै आएका छन्। युनुसले पनि यसबारे स्वीकार गरिरहेको उनका प्रवक्ताले रोयटर्ससँग भनेका छन्।
८४ वर्षीय युनुस र उनको ग्रामीण बैंकले सन् २००६ मा नोबल पुरस्कार जितेको थियो। लाखौं जनतालाई १०० डलरभन्दा कम रकमको ऋण (लघुवित्त) उपलब्ध गराएर गरिबी रेखाबाट निकालेकोमा उनलाई पुरस्कृत गरिएको थियो। हाल युनुस पेरिसमा रहेको रोयटर्सले जनाएको छ।
आरक्षणविरूद्धको आन्दोलन चर्किँदै गएपछि सोमबार प्रधानमन्त्री शेख हसिनाले राजीनामा दिएर देश छाडेकी थिइन्। उनी हाल भारतको शरणमा छिन्। उनले देश छाडेसँगै आन्दोलनकारीहरू प्रधानमन्त्री निवासमा प्रवेश गरेका थिए। एजेन्सीहरुको सहयोगमा ।
