सगरमाथा चुचुरोमा पुगे १ हजारभन्दा बढी आरोही

पर्यटन विभागले सार्वजनिक गरेको विवरणअनुसार यस वर्ष आरोहण अनुमति लिने विदेशी तथा नेपाली पर्वतारोहीको संख्या मात्रै होइन, सलामी दस्तुर संकलन र अभियानमा सहभागी टोलीको संख्या पनि अघिल्ला वर्षको तुलनामा उल्लेख्य रूपमा बढेको छ ।

विभागका महानिर्देशक रामकृष्ण लामिछानेले यसपटकको सिजनले नेपाली पर्वतीय पर्यटनका लागि नयाँ इतिहास रचेको बताए । उनका अनुसार अनुकूल मौसम, व्यवस्थापनमा सुधार र अन्तर्राष्ट्रिय स्तरमा नेपालको हिमाली पर्यटनप्रतिको आकर्षण बढेका कारण यस वर्ष आरोहण संख्या उच्च बनेको हो ।

सगरमाथामा स्थापना गरिएको अस्थायी फिल्ड कार्यालयका संयोजक खिमलाल गौतमका अनुसार शुक्रबार बिहानसम्म १ हजार ८ जनाले सफल आरोहण गरिसकेका छन् । उनले ७३औँ सगरमाथा दिवसको अवसरमा आयोजित कार्यक्रममा यस वर्षको उपलब्धिले नयाँ कीर्तिमान कायम गरेको जानकारी दिए ।

यसअघि एकै सिजनमा करिब ९ सय आरोहीले मात्रै सफल आरोहण गरेको रेकर्ड थियो । यस वर्ष त्यो संख्या उल्लेख्य रूपमा बढेर हजार नाघेको हो ।

पर्यटन विभागले यस सिजनमा ४ सय ९६ जनालाई सगरमाथा आरोहण अनुमति दिएको थियो । ती आरोहीसँगै गाइड, शेर्पा र सहयोगी टोलीसमेत अभियानमा सहभागी हुँदा सफल आरोहणको संख्या हजार नाघेको विभागको भनाइ छ ।

सगरमाथा आरोहणबाट राज्यले करिब १ अर्ब ८ करोड रुपैयाँ बराबरको सलामी दस्तुर संकलन गरेको तथ्यांक सार्वजनिक गरिएको छ । पर्वतीय पर्यटनबाट विदेशी मुद्रा आर्जन, रोजगारी सिर्जना तथा स्थानीय अर्थतन्त्र चलायमान बनाउन सगरमाथा क्षेत्रले महत्वपूर्ण योगदान पुर्‍याइरहेको सरकारको दाबी छ ।

यस वर्षको सिजनमा मौसम तुलनात्मक रूपमा अनुकूल रहेकाले धेरै आरोहीले छोटो अवधिमै शिखर चुम्न सफल भएको पर्यटन व्यवसायीहरू बताउँछन् । यद्यपि अत्यधिक भीडका कारण ‘डेथ जोन’ क्षेत्रमा ट्राफिक जामजस्तो अवस्था देखिएको भन्दै सुरक्षा र व्यवस्थापन चुनौतीबारे बहस पनि सुरु भएको छ ।

विशेषज्ञहरूले बढ्दो भीडसँगै हिमालको वातावरणीय संरक्षण, फोहोर व्यवस्थापन र आरोही सुरक्षामा थप ध्यान दिनुपर्ने आवश्यकता औँल्याएका छन् । सगरमाथामा आरोही संख्या निरन्तर बढ्दै जाँदा दिगो पर्वतीय पर्यटनलाई प्राथमिकतामा राख्नुपर्ने उनीहरूको सुझाव छ ।