अन्ततः बालेन र रविबीच सहकार्य, कस्तो प्रभाव पर्ला समकालीन नेपाली राजनीतिमा ?

टुरिजमफेस
काठमाडौं । अन्ततः काठमाडौं महानगरपालिकाका मेयर बालेन शाह र राष्ट्रिय स्वतन्त्र पार्टीका सभापति रवि लामिछानेबीच राजनीतिमा सहकार्य गर्नेबारे सहमति भएको छ । आउँदो फागुन २१ गते प्रतिनिधि सभाको निर्वाचन तोकिएको सम्मुखमा शाह र लामिछानेबीच सहकार्य हुनुलाई चौतर्फी चासोको रूपमा हेरिएको छ ।

समकालीन राजनीतिमा शाह र लामिछाने युवावर्गले रुचाइएका पात्र हुन् । लामो छलफलले प्रतिनिधि सभाको निर्वाचनपछि शाहलाई प्रधानमन्त्रीका रूपमा अघि सार्न लामिछाने र उनको पाटी तयार भएको छ र सोही अनुसार उनीहरूबीच हस्ताक्षर पनि भइसकेको छ । पार्टीको नाम, चुनाव चिह्न र झण्डा भने राष्ट्रिय स्वतन्त्र पार्टीकै हुनेछ । पार्टीको सभापति लामिछाने नै हुनेछन् ।

शाहलाई प्रधानमन्त्रीको रूपमा अघि सारेपछि उनीहरूबीच आगामी दिनमा सहकार्य गर्न अन्य ७ बुँदामा हस्ताक्षर पनि भएको छ । राष्ट्रिय स्वतन्त्र पार्टी (पहिलो पक्ष) र बालेन्द्र शाह (दोश्रो पक्ष) बीच भएको सहमति यस्तो छ

१. नवयुवाहरुले भ्रष्टाचार र कुशासन विरुद्ध गरेको आन्दोलनको अपनत्व लिंई घाइते तथा शहिद परिवारका मागहरुको यथोचित सम्बोधन गर्ने प्रतिवद्धता जनाउने,

२. समुन्नति र सामाजिक न्यायका राष्ट्रिय उद्देश्यहरूका लागि गरिनु पर्ने गहिरा नीतिगत, संस्थागत एवं संरचनात्मक सुधारहरु मार्फत आर्थिक–सामाजिक उन्नयन र सुसंस्कृत राजनीतिक अभ्यासको जगमा अर्को दश वर्षभित्र नेपाललाई सम्मानजनक मध्यम आय भएको राष्ट्र बनाउने मार्गचित्रको इमान्दार कार्यान्वयनप्रति समर्पित हुने,

३. पहिलो पक्ष र दोश्रो पक्षबीच बृहत् एकता भए पश्चात् स्थापित हुने राजनीतिक दलको नाम “राष्ट्रिय स्वतन्त्र पार्टी“, दलको झण्डा साविककै निलो पृष्ठभूमिको मध्य भागमा सेतो रङ्गको गोलाकार बीचमा निलो रङ्गको घण्टीको आकृति, दलको चुनाव चिन्ह घण्टी र केन्द्रीय कार्यालय काठमाडौँ उपत्यकामा रहने,

४. राष्ट्रिय स्वतन्त्र पार्टीको केन्द्रीय सभापति रवि लामिछाने रहने र आसन्न प्रतिनिधि सभाको निर्वाचनपछि संसदीय दलको नेता तथा भावी प्रधानमन्त्रीको उम्मेदवार बालेन्द्र शाह हुने,

५. बृहत् एकता पश्चात् पार्टीको संगठनात्मक संरचनालाई थप सक्षम र फराकिलो बनाउन युवा अभियन्ता एवं अनुभवी विज्ञहरुलाई समुचित समायोजन गर्दै जिम्मेवारी तोक्दा योग्यता, समावेशिता र सार्वजनिक छविलाई आधार मान्ने,

६. यस सम्झौता बमोजिम राष्ट्रिय स्वतन्त्र पार्टी सम्बन्धी दस्तावेज निर्वाचन आयोगमा अद्यावधिक गर्ने,

७. राष्ट्रिय स्वतन्त्र पार्टीको सिद्धान्त, नेतृत्व र चुनाव चिन्ह ’घण्टी’ मा गोलबद्ध भइ लोकतान्त्रिक सुशासन, समुन्नति र सामाजिक न्यायका मुद्धा अघि बढाउन अन्य सुसंस्कृत एवं परिवर्तनकामी वैकल्पिक राजनीतिक शक्ति, समूह र व्यक्तिहरूलाई आव्हान गर्ने ।