विशेष महाधिवेशनले कांग्रेस कमजोर बन्यो : पूर्णबहादुर खड्का

कांग्रेस कर्णाली प्रदेश समितिले सुर्खेतमा आयोजना गरेको ‘पार्टीको बृहत्तर एकता र भावी कार्यदिशा’ विषयक विचार गोष्ठीलाई सम्बोधन गर्दै खड्काले अनावश्यक रूपमा गरिएको विशेष महाधिवेशनले पार्टी संगठन कमजोर बनेको टिप्पणी गरे।

दुईदिने गोष्ठीको पहिलो दिन  मन्तव्य राख्दै उनले कांग्रेसभित्रको आन्तरिक अस्थिरताले निर्वाचन परिणाममा प्रत्यक्ष असर परेको दाबी गरे।

उनका अनुसार पार्टीभित्र विशेष महाधिवेशन नभएको भए राजनीतिक समीकरण फरक हुने थियो। उनले भने, “त्यस्तो अवस्था आएको भए राष्ट्रिय स्वतन्त्र पार्टी सबैभन्दा ठूलो दल बन्न सक्थ्यो, तर कांग्रेसले ६०–६५ सिटसम्म ल्याउन सक्थ्यो। एमाले ३०–३५ र माओवादी १५–२० सिटमा सीमित हुन्थे। तर विशेष महाधिवेशनपछि कांग्रेस ३८ सिटमा झर्‍यो र रास्वपा दुई तिहाइनजिक पुग्ने अवस्था बन्यो।”

खड्काले अहिले कांग्रेस विभाजनको जोखिमतर्फ उन्मुख भइरहेको समेत बताए। पार्टी नेतृत्वभित्र बढ्दो अहंकार, व्यक्तिगत स्वार्थ र शक्ति संघर्षले संगठनलाई कमजोर बनाएको उनको भनाइ थियो।

उनले नेताहरूलाई व्यक्तिगत महत्वाकांक्षा, पारिवारिक स्वार्थ, सम्पत्तिप्रतिको मोह र नातावादभन्दा माथि उठेर कार्यकर्तामाझ फर्किन आग्रह गरे। पार्टी सभापति र उपसभापतिसँग भेटेर पार्टीलाई विभाजनको दिशामा जान नदिन सुझाव दिएको पनि उनले जानकारी दिए।

गोष्ठीमा कांग्रेस नेता तथा कर्णाली प्रदेशसभा संसदीय दलका नेता जीवनबहादुर शाही सहित पार्टीका वर्तमान तथा पूर्व पदाधिकारी, प्रदेश र जिल्ला कार्यसमितिका सदस्य, भ्रातृ संस्थाका प्रतिनिधि तथा विभिन्न तहका सभापतिहरू सहभागी छन्।

त्यसैगरी कर्णालीका विभिन्न जिल्लाबाट निर्वाचित प्रतिनिधिसभा सदस्य, प्रदेशसभा सदस्य, जिल्ला समन्वय समिति प्रमुख–उपप्रमुख, नगरपालिकाका मेयर–उपमेयर तथा गाउँपालिका अध्यक्ष–उपाध्यक्षहरूको पनि उपस्थिति रहेको छ।

केही दिनअघि कांग्रेसले आयोजना गरेको प्रदेशस्तरीय भेलामा सहभागी अधिकांश नेता–कार्यकर्ता पनि उक्त गोष्ठीमा सहभागी भएका छन्। कार्यक्रम दुई दिनसम्म सञ्चालन हुनेछ।