दुईदिने बिदा र बढ्दो आकर्षणले वर्षायाममै चितवनको पर्यटन चलायमान

पर्यटन व्यवसायीहरूका अनुसार यस वर्ष वर्षायाममा पनि आन्तरिक तथा विदेशी पर्यटकको आगमन अघिल्ला वर्षहरूको तुलनामा बढेको छ। विशेषगरी भारतीय र चिनियाँ पर्यटकको संख्या उल्लेखनीय रूपमा वृद्धि भएको उनीहरूको भनाइ छ।

क्षेत्रीय होटल सङ्घ चितवनका महासचिव महेश खनालले सामान्यतया वर्षायाममा होटलको अकुपेन्सी करिब ३० प्रतिशत रहने गरे पनि यस वर्ष ५० प्रतिशतसम्म पुगेको जानकारी दिए। उनका अनुसार दुईदिने बिदा लागू भएपछि गत वर्षको यही अवधिको तुलनामा आन्तरिक पर्यटकको संख्या झन्डै २५ प्रतिशतले बढेको छ। विद्यालय तथा कलेजको बिदाले समेत घुमफिरलाई थप प्रोत्साहन गरेको उनले बताए।

भारतीय पर्यटकको आगमन पनि सकारात्मक रूपमा बढिरहेको खनालको भनाइ छ। यद्यपि सडक पूर्वाधार कमजोर हुँदा केही पर्यटकले अन्य गन्तव्य रोज्ने गरेको उनले उल्लेख गरे। पोखरालगायत पहाडी क्षेत्रमा भारतीय पर्यटकको आकर्षण बढे पनि त्यसको प्रभाव चितवनमा समेत देखिएको छ।

एक समय वर्षायाममा सौराहाका केही होटल बन्द हुने अवस्था रहे पनि पछिल्ला वर्षहरूमा पर्यटन व्यवसाय विस्तार भएसँगै वर्षायामलाई लक्षित गर्दै विशेष प्रवर्द्धनात्मक कार्यक्रम सञ्चालन गर्न थालिएको छ। यसले अफ-सिजन मानिने समयमा पनि पर्यटक तान्न सहयोग पुगेको व्यवसायीहरूको विश्वास छ।

होटल सङ्घ नेपालका केन्द्रीय सदस्य तथा क्षेत्रीय होटल सङ्घ चितवनका पूर्वअध्यक्ष सुमन घिमिरेले दुईदिने बिदाले पर्यटन क्षेत्रलाई प्रत्यक्ष फाइदा पुर्‍याएको बताए। उनका अनुसार बिदाको एक दिन अपेक्षाकृत शान्त भए पनि अर्को दिन पर्यटकको चाप उल्लेख्य रूपमा बढ्ने गरेको छ।

घिमिरेले हाल नेपाल भारतीय पर्यटकका लागि आकर्षक गन्तव्य बन्दै गएको बताए। भारतको कोलकाता भ्रमणका क्रममा त्यहाँका पर्यटन व्यवसायीहरूले नेपालप्रति बढ्दो रुचि देखिएको जानकारी दिएको उनले सुनाए। मध्यपूर्वमा जारी द्वन्द्व, थाइल्यान्डको कडा भिसा नीति तथा भारतको विदेशी मुद्रा व्यवस्थापनसम्बन्धी नीतिका कारण पनि भारतीय पर्यटक नेपालतर्फ आकर्षित भएको उनको विश्लेषण छ।

पर्यटन व्यवसायी दीपक भट्टराईले पनि दुईदिने सार्वजनिक बिदाले आन्तरिक पर्यटनमा सकारात्मक प्रभाव पारेको बताए। पटिहानीस्थित होटल जङ्गल भिल्लाका सञ्चालक गणेश पौडेलले समेत गत वर्षको तुलनामा यस वर्ष पर्यटक संख्या बढेको र त्यसमा दुईदिने बिदाको महत्वपूर्ण भूमिका रहेको बताए।

हाल सौराहामा १४१ होटल सञ्चालनमा छन् भने पटिहानी, जगतपुर र मेघौलीमा पनि सुविधासम्पन्न पर्यटकीय होटलहरू सञ्चालनमा छन्। यी होटलहरूले दैनिक करिब १० हजार पर्यटकलाई सेवा दिन सक्ने क्षमता राख्छन्।

चितवन राष्ट्रिय निकुञ्ज र आसपासका सामुदायिक वन क्षेत्र एकसिङ्गे गैँडा, पाटेबाघलगायत दुर्लभ वन्यजन्तुको अवलोकनका लागि प्रसिद्ध छन्। जीप सफारी, हात्ती सफारी र डुङ्गा सयरजस्ता गतिविधिले स्वदेशी तथा विदेशी पर्यटकलाई वर्षभरि नै आकर्षित गरिरहेका छन्।