गुल्मीमा भौगोलिक दूरी घटाउँदै झोलुङ्गे पुल, घण्टा लाग्ने बाटो मिनेटमै छोट्टियो

टुरिजमफेस
गुल्मी । सामान्यतया नदी पार गर्न पुल निर्माण गरिन्छ । तर, गुल्मीमा भने यात्रा छाट्याउनका लागि झोलुङ्गे पुल निर्माण गर्ने गरिएको छ । पछिल्लो समय जिल्लाका चार स्थानमा निर्माण भएका झोलुङ्गे पुलले गाउँको पैदल यात्राको दूरी घटाएका छन् ।

यी पुलहरु पर्यटकीय गन्तव्यसमेत बनेका छन् । केही दिनअघि मात्रै निर्माण सम्पन्न भएको मालिका गाउँपालिका–५ को छापहिले लाकुरीलाई वडानम्बर–२ चुत्राबोट जोड्ने गरी जिल्लामै सबैभन्दा लामो झलुङ्गे पुल निर्माण भएको छ । यो पुल खोला तर्नकाभन्दा पनि एउटा वडाबाट अर्को वडासम्म जोड्न निर्माण गरिएको हो ।

पुल निर्माण भएसँगै वारिपारि गर्ने २ घण्टाको दूरी केही मिनेट भरमै पुग्न सकिने मालिका गाउँपालिका वडानम्बर–६ का पूर्ववडाअध्यक्ष शोभाखर गिरीले बताए । झोलुङ्गे पुल निर्माण भएसँगै भौगोलिक रुपमा विकट क्षेत्रमा रहेका मालिका गाउँपालिका वडानम्बर–१, २, ३ का नागरिकलाई पैदल यात्रा छोटाएको उनले बताए ।

ती वडाबाट पैदल यात्रामार्फत गाउँपालिका केन्द्रसम्म पुग्न दूरी छोट्याएको छ । मालिका वडानम्बर–५ का नागरिकलाई दर्लिङ्ग किनमेल गर्नका निम्ति पनि छिटो छरितो पुग्न सकिने भएको छ ।

यो झोलुङ्गे पुल अग्लो स्थानमा निर्माण भएकाले पनि पर्यटकीय गनतव्य समेत बन्ने उद्देश्यले निर्माण भएको गिरीले बताए । पुलको लम्बाइ ३७५ मिटर लम्बाइ रहेको छ ।

झोलुङ्गे पुल २ करोड ३ लाख चालीस हजार लागतमा निर्माण भएको हो । झोलुङ्गे पुलको उद्घाटन लुम्बिनी प्रदेशका आर्थिक मामिला तथा योजना मन्त्री धनेन्द्र कार्कीले गरेका हुन ।

मन्त्री कार्कीले यो झोलुङ्गो पुलले वारिपारि गर्न दूरी कमसँगै यहाँको आन्तरिक पर्यटनमा टेवा पुग्ने अपेक्षा राखेको बताए । यो पुलको निर्माण निलगिरी निर्माण सेवा प्रालिले गरेको हो ।

धुर्कोटको ५ र ६ वडा जोड्ने पुल । त्यस्तै एक वर्षअघि मात्रै जिल्लाको धुर्कोट गाउँपालिकामा रहेको पर्यटकीय स्थल विचित्र गुफा पुग्ने स्थानमा धुर्कोट वडानम्बर–५ र इस्मा गाउँपालिका वडानम्बर–६ जोड्ने गरि झोलुङ्गे पुल निर्माण भएको छ ।

धुर्कोट ५ वस्तुमा रहेको विचित्र गुफा र धुर्कोट परमानन्द बहुमुखी क्याम्पसमा पुग्ने विद्यार्थीहरुका सहजताका लागि झोलुङ्गे पुल निर्माण गरिएको हो ।

राङदाल चौर र विचित्र गुफा क्षेत्र जोड्ने गरि छल्दीखोला माथी झोलुंगे पुल निर्माण गरिएको छ । खोलामाथि निर्माण भएपनि यो पुलले पनि पदैल यात्रीको वारिपारि आउ–जाउ गर्ने गरी दूरी कम गरेको छ ।

इस्मा गाउँपालिकाको वडानम्बर–६ बाट वस्तुमा पढ्न जाने विद्यार्थीहरुलाई पनि सहज हुने भएको छ । लामो तथा अग्लो स्थानमा निर्माण गरिएको उक्त झोलुंगे पुलले विचित्र गुफा पुग्न बाटो समेत छोटो बनाइदिएको छ ।

१ करोड ८९ लाखको लागतमा निर्माण भएको छ । नेपाल सरकार शहरी विकास मन्त्रालयबाट ३ सय ७० मिटर लम्बाइ रहेको पुलमा एकपटकमा ७९९ जना पदयात्री आउजाउ गर्न मिल्ने गरी निर्माण भएको छ । यो पनि निलगिरी निर्माण सेवा प्रालिले निर्माण गरेको हो । यस भेगमै लामो र अग्लो स्थानमा बनेको झोलुङ्गे पुलले विचित्र गुफा पुग्ने पर्यटक बढाउने धुर्कोट गाउँपालिकाको अपेक्षा रहेको छ ।

जिल्ला सदरमुकाम तम्घासमा पनि एउटा वडाबाट अर्को वडामा जानको लागि झोलुङ्गे पुल निर्माण भएको छ । केही महिनाअघि मात्रै निर्माण सम्पन्न भएको रेसुङ्गा नगरपालिका वडानम्बर–२ उदिनढुंगा र वडानम्बर–७ लसुने डाँडा जोडने नमून झोलुंगे पुल निर्माण भएको छ ।

दुईवटा वडाका स्थानीयलाई वारिपारि आउजाउ गर्न पैदल यात्रा गर्दा घुमारो बाटो हिँड्नु पर्ने बाध्यतामा रहेका नागरिकको सहजताको लागि झोलुंगे पुल बनाइएको हो । अर्को तम्घास बजारमा घुम्न आउने आन्तरिक तथा बाह्य पर्यटकहरुलाई मनोरञ्जन गर्न नि झोलुङ्गे पुल निर्माण भएको छ ।

रेसुङ्गा २ र ७ वडा जोड्ने पुल । लसुने डाँडाबाट तम्घास बजार आउन २० मिनेटभन्दा बढी समय लाग्ने बाटो २ मिनेटमै पुग्न सकिने भएको छ । तम्घास बजारको उदिनढुंगाबाट साखिने डाँडा पुग्ने ३५७ मिटर लामो पुलको निलगिरी निर्माण सेवा प्रालिले गरेको हो ।

नेपाल सरकार शहरी विकास मन्त्रालय स्पेन्सन बृज डिभिजनमार्फत १ करोड ८४ लाखको लागतमा पुल निर्माण भएको इन्जिनियर प्रवेश रेग्मीले बताए । पुलको पारबहन क्षमता १०७ मेट्रिक टन रहेको छ ।झोलुङ्गे पुलमा एक पटकमा ७७२ जना पदयात्री हिड्न मिल्ने क्षमताको रहेको छ ।

रेसुङ्गा नगरपालिका वडानम्बर–७ र वडानम्बर–९ जोड्न पनि नमूना झोलुङ्गे पुल निर्माण भएको छ । करिब ४ वर्ष पहिले वडानम्बर–७ भुजलखर्क र वडानम्बर–९ विद्युत कार्यालय नजिकैका स्थानीयलाई वारिपारि गर्न पैदल यात्रा गर्दा घुमारो बाटो हिँड्नुपर्ने भएपछि झोलुङ्गे पुल बनाइएको हो । पुल बनेपछि नगरपालिका जान र वडा वडाबीच पनि वारिपारि गर्न घुमाउरो बाटो हिँड्न नपर्ने भएको स्थानीयको भुने सुनारले बताए ।

वारिपारि गर्दा ३० मिनेटभन्दा बढी पैदल यात्रान गर्नुपर्ने बाध्यता रहेकोमा अहिले केही मिनेटमै बाटो छोटिएको छ । झोलुंगे पुल निर्माणको लागि सामाजिक तथा प्राविधिक सहयोग सिर्जनशील सामुदायिक विकास केन्द्र गुल्मीले गरेको छ ।

कुल ५० लाख ६६ हजार ७७ रुपैयाँको लागतमा उक्त पुल निर्माण भएको हो । झोलुंगे पुल क्षेत्रगत कार्यक्रम अन्तर्गत ९२ प्रतिशत, रेसुङ्गा नगरपालिकाको ६ प्रतिशत र उपभोक्ता समितिको २ प्रतिशत श्रमदानमार्फत बनेको हो ।

पुल निर्माणको लागि हेल्मेटार नेपाल (टिभिएसयु) ले लठ्ठा सहयोग गरेको थियो । विद्युत चोक बगाले खोला भुजेल खर्क जोडने पुलको लम्बाइ ११८ मिटर लम्बाइ रहेको छ ।