काठमाडौं उपत्यकामा प्रवासी जलचरहरूको आगमन, चरा प्रेमीका लागि उत्साह (फोटोफिचर)
- सुप्रदीप्त न्यौपाने
काठमाडौं । काठमाडौं उपत्यकाका जलाशयहरूमा हालै विभिन्न प्रजातिका प्रवासी जलचरहरू देखिएका छन्।
यी चराहरू उत्तरी युरोप र एसियाका क्षेत्रहरूमा प्रजनन गर्छन् र कठोर हिउँदबाट जोगिन दक्षिणतर्फ आउने गर्छन्। हरेक वर्ष करिब १५० भन्दा बढी प्रजातिका प्रवासी चराहरू जसमा सयभन्दा बढी जलचरहरू पर्छन् – नेपालका ताल, खोँचो र नदी किनारहरूमा आइपुग्छन्, जसले उपत्यकाका जलाशयहरूलाई जीवन्त वन्यजन्तुको आश्रयस्थलमा रूपान्तरण गर्छ।
काठमाडौंको टौदह र नागदह ताल यस्ता प्रवासी जलचरहरूको प्रमुख हिउँदे बासस्थानका रूपमा परिचित छन्। यी आगन्तुक चराहरूको आगमनले काठमाडौंका तालहरूको पारिस्थितिक महत्वलाई अझ बलियो बनाएको छ।
विज्ञहरूको भनाइमा, यस्ता प्रवासी चराहरूको आगमनले नेपालका जलाशयहरूमा जैविक विविधताको संरक्षणमा महत्वपूर्ण योगदान पुर्याउँछ र चरादर्शन पर्यटनलाई पनि प्रवर्द्धन गर्छ। गत वर्ष काठमाडौंमा दुई दशकपछि देखिएको बैकाल टिल हाँसलाई चराविद्हरूले “जैविक विविधताका लागि सकारात्मक संकेत”को रूपमा व्याख्या गरेका थिए।
हालै २-३ दिन अघि बागमती नदीमा ४०-५० को संख्यामा कालो टाउके गंगाचीलहरु आएका थिए, ति चराहरु आज सम्म पनि केही संख्यामा त्यही रमाईरहेका छन।
यस्ता आगमनहरूले उपत्यकाको प्राकृतिक सौन्दर्य मात्र होइन, नेपालका चरा प्रेमी र प्रकृति संरक्षणमा रुचि राख्ने समुदायका लागि पनि उत्साह र गर्वको विषय बनेको छ।
