टोखाबाट बरामद भएको २५ करोड रुपैयाँ बराबरको विदेशी मुद्राका मालिक नारायण पौडेल

टुरिजमफेस
कठमाडौं । केही दिनअघि टोखाबाट बरामद भएको २५ करोड रूपैयाँ बराबरको विदेशी मुद्राका मालिक नारायण पौडेल रहेको खुलेको छ । चीनतर्फ जाँदै गरेको गाडीसहित त्यो रकम पक्राउ भएपनि मालिकको पहिचान हुन नसक्दा अनेक आशंका हुँदै आएको थियो ।

राजश्व अनुसन्धान विभागका महानिर्देशक चण्डीप्रसाद घिमिरेका अनुसार पौडेल सिन्धुपाल्चोक, भोटेकोशी गाउँपालिका–४ घर भई काठमाडौंको टोखा नगरपालिका– वडा १० महादेवटार हाइट बस्दै आएका थिए । उनको पृष्ठभूमि विभिन्न आपराधिक क्रियाकलामा संलग्न रहेको अधिकारीहरूले बताएका छन् । प्रहरीका अनुसार पौडेल विगतमा रक्तचन्दन, सुन, विदेशी मुद्रा अपचलन (हुण्डी) मा संलग्न हुँदै आएका व्यक्ति हुन् । उनी यसअघि विदेशी मुद्रा अपचलनकै कसुरमा पक्राउ परी धरौटीमा रिहा भएका हुन् ।

उनका चार दाजुभाइमध्ये एक जना नेकपा एमाले र अर्को नेकपा माओवादी केन्द्रमा लागेका छन् । उनी पक्राउ नहुँदै विभागले परिचय सार्वजनिक गरेपछि प्रहरी भने असन्तुष्ट बनेको छ । गत चैत ४ गते राति काठमाडौं उपत्यका अपराध अनुसन्धान कार्यालयको टोलीले टोखाको झोरबाट नारायणी प्रदेश–७ ख १६५२ नम्बरको ट्रक र चालक कुशाङ लामासहित २५ करोड बराबरको विदेशी मुद्रा सहित पक्राउ गरेको थियो । जसमा १३ लाख ७५ हजार १५० युरो र ३ लाख २० हजार ८५० डलर बरामद भएको थियो ।