ठूलो बाढीपछि पनि सामान्य देखिएको पुल अचानक भाँचियो

कञ्चनपुर — महाकाली नदीमाथि रहेको दोधारा–चाँदनी झोलुंगे पुल बुधबार बिहान अचानक चुँडिएको छ। पुलमा समस्या देखिएलगत्तै आवतजावत रोकिएकाले सम्भावित मानवीय क्षति भने टरेको छ।

असोज ९ गतेदेखि केही दिनसम्म परेको लगातार वर्षापछि महाकाली नदीमा पानीको बहाव डेढ लाख क्यूसेकभन्दा माथि पुगेको थियो। सोमबारदेखि वर्षा रोकिएपछि नदीको बहावसमेत घटेर सामान्य अवस्थामा फर्किएको थियो।

बुधबार बिहान मौसमसमेत सफा थियो। तर दोधारा–चाँदनी नगरपालिका–४ मा रहेको झोलुंगे पुलका करिब चार–पाँच मिटर लामो फलामे फ्ल्याकहरू माथितिर उठेको देखिएपछि पुलमा आवतजावत तत्काल बन्द गरिएको थियो।

आवतजावत रोकिएको केही समयमै त्यही भागबाट पुल चुँडिएको हो। पुलका लठ्ठासहितको ठूलो भाग महाकाली नदीतर्फ लत्रिएको छ। पुलका पिल्लरमा समेत क्षति पुगेको बताइएको छ।

बाढीले कमजोर बनाएको हुन सक्ने अनुमान

ठूलो बाढीको समयमा नभई नदीको बहाव घटिसकेको अवस्थामा पुल चुँडिएपछि यसको कारणबारे चासो बढेको छ।

प्रारम्भिक रूपमा भने केही दिनअघि आएको बाढीका कारण पुलका संरचनामा क्षति पुगेको हुन सक्ने अनुमान गरिएको छ। लगातारको बाढीले पिल्लर तथा अन्य संरचना कमजोर बनाउँदै लगेपछि त्यसको प्रभाव बुधबार देखिएको हुन सक्ने अधिकारीहरूको भनाइ छ।

कञ्चनपुरका प्रमुख जिल्ला अधिकारी मदन कोइरालाले प्रारम्भिक रूपमा बाढीका कारण पुलमा क्षति पुगेको हुन सक्ने बताए। उनका अनुसार अहिले प्राविधिक टोलीले पुलको अवस्थाबारे अध्ययन गरिरहेको छ।

प्राविधिक अध्ययनबाट क्षतिको वास्तविक कारण र संरचनामा परेको असरबारे विस्तृत जानकारी प्राप्त भएपछि थप कदम चालिने उनको भनाइ छ।

२०६१ सालमा बनेको पुल

दोधारा–चाँदनी झोलुंगे पुल २०६१ सालमा निर्माण भएको हो। करिब १.४५ किलोमिटर लामो यो पुल निर्माणपछि केही वर्षसम्म एसियाकै दोस्रो लामो झोलुंगे पुलका रूपमा परिचित थियो।

महाकाली नदीपारि रहेको दोधारा–चाँदनीलाई जिल्लाका अन्य क्षेत्रसँग जोड्ने प्रमुख माध्यमका रूपमा यो पुल रहँदै आएको थियो। आवतजावतका अतिरिक्त पर्यटकीय आकर्षणका रूपमा समेत पुलको महत्व थियो।

तर पछिल्ला वर्षमा पुल जीर्ण बन्दै गएको बताइएको छ। दोधारा–चाँदनी नगरपालिका र भीमदत्त नगरपालिकाले समय–समयमा पुलको मर्मतसम्भार गर्दै आएका थिए।

आवतजावत ठप्प, पुनर्निर्माणको तयारी

पुल चुँडिएपछि दोधारा–चाँदनीतर्फको पैदल आवतजावत प्रभावित भएको छ। स्थानीयका लागि महाकाली नदी पार गर्ने महत्वपूर्ण सम्पर्क मार्ग अवरुद्ध हुँदा दैनिक आवतजावतमा समस्या परेको छ।

प्रशासनले नदीमा लत्रिएको पुलका लठ्ठा तथा अन्य संरचना सुरक्षित रूपमा निकाल्न सकिने अवस्था भए त्यसका लागि आवश्यक काम अघि बढाउने जनाएको छ।

प्रमुख जिल्ला अधिकारी कोइरालाका अनुसार झोलुंगे पुलसम्बन्धी प्राविधिक टोलीसँग समन्वय गरी क्षतिको मूल्यांकन र पुनर्निर्माणको प्रक्रिया अघि बढाउने तयारी भइरहेको छ।

प्रारम्भिक अवस्थाको क्षति हेर्दा पुललाई पुनः सञ्चालनमा ल्याउन केही समय लाग्ने देखिएको छ। प्राविधिक अध्ययनपछि मात्रै पुनर्निर्माणको स्वरूप र समयबारे स्पष्ट हुने बताइएको छ।