गोसाईंकुण्डमा पर्यटक बढ्दा रसुवाले पायो पौने ५ करोड राजस्व, मानसरोवर जाने पर्यटक नै ३ हजार
गोसाइकुण्डको यात्रामा पर्यटक
रसुवा। रसुवाका धार्मिक तथा प्राकृतिक पर्यटकीय स्थल घुम्ने पर्यटकको संख्यामा उल्लेख्य रुपमा वृद्धि भएको पाइएको छ ।
प्रसिद्ध धार्मिकस्थल गोसाईंकुण्ड तथा जैविक विविधता र प्राकृतिक सम्पदाको हिसाबले धनी एवं रमणीय लाङटाङ क्षेत्र घुम्न आउने पर्यटकको सङ्ख्या ११ महिनामै ४२ हजार नाघेको छ ।
विशेष गरी पवित्र तीर्थस्थलको दर्शनसहित हिमाल तथा पहाडको सुन्दर दृश्य हेरी रमाउने र स्थानीय तामाङ समुदायको कला संस्कृतिको अवलोकन गर्ने उद्देश्यले पर्यटक रसुवा आउने गरेको देखिन्छ ।
चालु आर्थिक वर्षको पछिल्लो ११ महिनामा गोसाईंकुण्ड तथा लाङटाङ क्षेत्रमा ४२ हजार २३० आन्तरिक एवं बाह्य पर्यटकले भ्रमण गरेको लाङटाङ राष्ट्रिय निकुञ्ज कार्यालयले जनाएको छ ।
निकुञ्जका अभिलेखकर्ता रेञ्जर केशव ढौडारीका अनुसार स्वदेशी ३० हजार ७५० र बाँकी ११ हजार ४८० विदेशी नागरिक गत साउनदेखि जेठ मसान्तसम्ममा रसुवा जिल्ला घुम्न आएका हुन् । गत आर्थिक वर्ष रसुवा घुम्न आउने पर्यटकको सङ्ख्या जम्मा ३२ हजार ५९७ मात्र रहेको निकुञ्जले जनाएको छ ।
आन्तरिक पर्यटक लाङटाङतर्फको प्राकृतिक दृश्यको अवलोकनपछि गोसाइँकुण्डमा जल स्नान गरी फर्कने गर्दछन् । सङ्घीय राजधानी काठमाडौँबाट नजिक रहेको धार्मिक तथा पर्यटकीयस्थल रसुवामा विशेष गरी तीथयात्रुसहित युवायुवतीको घुम्न आउने क्रम बढेको छ ।
निकुञ्जका अनुसार सोही अवधिमा आगन्तुक पर्यटक, वन पैदावार र हेलिकोप्टर अवतरण शुल्कबापत रु चार करोड ८१ लाख राजस्व सङ्कलन भएको छ ।
नेपालीलाई प्रतिव्यक्ति रु एक सय ‘सार्क’ राष्ट्रका नागरिकलाई रु एक हजार ५०० र अन्य देशका पर्यटकलाई रु तीन हजारका दरले निकुञ्ज प्रवेश शुल्क लिने कानुनी व्यवस्था रहेबमोजिम उक्त रकम सङ्कलन भएको निकुञ्जका वरिष्ठ संरक्षण अधिकृत श्यामकुमार शाहले जानकारी दिए ।
यसैगरी, ‘मानसरोवर कैलास’ यात्राका लागि दुई हजार ९५२ जना रसुवागढी नाका हुँदै चीनतर्फ प्रस्थान गरेको स्थानीय अध्यागमन कार्यालयले जनाएको छ ।
अध्यागमन कार्यालय घट्टेखोला रसुवागढीका प्रमुख लेखनाथ खतिवडाका अनुसार मानसरोवरका अतिरिक्त ८८५ जना पर्यटक तिब्बतको लाह्सा र १५९ जना पर्यटक चाइना एभरेष्टतर्फ प्रस्थान गरेको पाइएको छ । रासस
गोसाइकुण्डको यात्रामा पर्यटक
