पर्यटक स्वागतका लागि नेपाली संस्कृति र साहस अद्वितीय

टुरिजमफेस
काठमाडौं । नेपाल पर्यटन बोर्डले बेइजिङ अन्तर्राष्ट्रिय पर्यटन प्रदर्शनी (बीआईटीई) मा नेपाल पर्यटक स्वागतका लागि प्रकृति, संस्कृति र साहसिकताको अद्वितीय संयोजनसहित तयार रहेको जनाएको छ ।

बेइजिङको चाओयाङ जिल्लास्थित चाइना इन्टरनेश्नल एक्जिविसिजमा सम्पन्न तीनदिने प्रदर्शनीका क्रममा बोर्डका वरिष्ठ प्रबन्धक सुमन घिमिरेले नेपाल प्रकृति, संस्कृति, साहसिकता र पाहुना सत्कारको अनुपम संयोजनसहित पर्यटक स्वागतका लागि तयार रहेको बताए । उनले छिमेकी मुलुक चीन नेपालका लागि पहिलेदेखि पर्यटकीय स्रोत मुलुक भएकाले स्वागतका लागि तयार रहेको उल्लेख गर्दै नेपालले कला, संस्कृति, होलिडे, बुद्धिजमलगायतका विषयलाई पर्यटन प्याकेजमा राखेकोसमेत उल्लेख गरे ।

२७ जुनदेखि सुरु भएको प्रदर्शनीका क्रममा बोर्डले नेपालको अध्यात्म, सांस्कृतिक विविधता र प्राकृतिक सौन्दर्यलाई सशक्त रूपमा अन्तर्राष्ट्रिय मञ्चमा प्रस्तुत गरेको हो । प्रदर्शनीमा आएका पर्यटन व्यवसायी र अवलोकनकर्ताहरुले नेपालको सफ्ट एड्भेन्चर, सांस्कृतिक परिपथ, अध्यात्मिक गन्तव्य तथा छोटो अवधिका विश्राम भ्रमणहरूमा गहिरो चासो देखाएको बोर्डले जनाएको छ ।

नेपालप्रति देखिएको विशेष आकर्षणलाई प्रतिबिम्बित गर्दै नेपालको पविलियनलाई ’बेस्ट पपुलारिटी अवार्ड’ समेत प्रदान गरिएको थियो । बोर्डका अनुसार पहिलो दुई दिन बीटुबी नेटवर्किङ र अन्तिम दिन बीटुसी अन्तरक्रियालाई लक्षित गरी प्रदर्शनी गरिएको थियो । नेपाल पर्यटन बोर्डले प्रदर्शनीको साइडलाइन सत्रमा एक विशेष गन्तव्य प्रस्तुतिका क्रममा चिनियाँ पर्यटन व्यवसायीसँग सहकार्य गर्दै नेपाली भ्रमणलाई ‘लाइफटाइम एक्सपेरियन्स’ बनाउने सन्देश पनि दिएको छ ।

नेपाल पविलियन यहाँको समृद्ध सांस्कृतिक र ऐतिहासिक सम्पदा, हिमाली रोमाञ्चक अनुभवहरू तथा विविध पर्यटकीय सम्भावनाहरूलाई आकर्षक शैलीमा चित्रण गरिएको थियो । सहभागी निजी पर्यटन व्यवसायीहरूले पनि नेपालका उत्कृष्ट ट्राभल प्याकेजहरू प्रस्तुत गर्दै पर्यटकलाई बहुआयामिक अनुभव दिने क्षमताको बारेमा जानकारी गराएका थिए । बीआटीई–२०२५ मा नेपालका उर्जा, जलस्रोत तथा सिँचाइ मन्त्री दीपक खड्का, बेइजिङस्थि नेपाली दूतावासका उपनियोग प्रमुख रोशन खनाल, आर्थिक मामिला विभागबाट पार्वती अर्याल तथा अन्य उच्च अधिकारीहरूले नेपाल पविलियन अवलोकन गरेका थिए ।

प्रदर्शनीमा पर्ल होलिडेज, आउटसाइन एड्भेन्चर, नेपाल हिमालयन इन्टरनेसनल ट्राभल कम्पनी, जर्नी डीएमसी प्रालि, हिमालय सेफ्टी ट्रेक्स एण्ड एक्सपिडिसन, ड्रागन होलिडेज, एक्सेसिबल एड्भेन्चर, फ्रेन्ड्स एड्भेन्चर टिमलगायतका पर्यटन व्यवसायीहरू सहभागी थिए । नेपाली प्रतिनिधिमण्डलले माल्दिभ्स र रुसको सेन्ट पिटर्सबर्गका पर्यटन व्यवसायीसँग द्विपक्षीय पर्यटन  प्रवर्द्धनका लागि छलफलसमेत गरेका थिए ।