मन्त्रिपरिषद् विस्तारः दुई मन्त्रीको सपथ, गणपतिलालले पर्यटन मन्त्री नपाउँदा रोकियो भने सुनारको हकमा के भयो ?

टुरिजमफेस
काठमाडौं । नवनियुक्त दुई मन्त्रीहरुले पद तथा गोपनियताको सपथ लिएका छन् । राष्ट्रपति रामचन्द्र पौडेलले राष्ट्रपति कार्यालय, शीतलनिवासमा आयोजित विशेष समारोहमा नवनियुक्त स्वास्थ्य तथा जनसङ्ख्यामन्त्री डा सुधा गौतम र युवा तथा खेलकुदमन्त्री बब्लु गुप्ताले सपथ लिएका हुन् । यसअघि  चार मन्त्रीले शपथ लिने भनिए पनि अन्तिम समयमा दुई जना मन्त्रीको मात्रै शपथ भएको हो ।

गौतम स्वास्थ्य मन्त्रालयका पूर्वसचिव हुन् गुप्ता जेनजी आन्दोलनका अगुवा हुन् । प्रधानमन्त्री सुशीला कार्कीको सिफारिसमा उनीहरुलाई राष्ट्रपति पौडेलले  नियुक्ति गरेका हुन् ।

गत भदौ २७ गते गठित मौजुदा मन्त्रिपरिषद् विस्तारसँगै १० पुगेको छ । यसअघि गत भदौ ३० र असोज ६ गते मन्त्रिपरिषद् विस्तार भएको थियो ।

यसअघि गणपतिलाल श्रेष्ठ र खगेन्द्र सुनार पनि मन्त्री बन्ने चर्चा थियो । श्रेष्ठले पर्यटन मन्त्री चाहेको तर प्रधानमन्त्री कार्कीले भूमिसुधार मन्त्री बनाउन खोजेपछि उनले अस्वीकार गरेका थिए भने सुनारका विरुद्ध मुद्दा परेकाले विवाद सृजना भएको थियो ।

सपथ ग्रहण समारोहमा उपराष्ट्रपति रामसहायप्रसाद यादव, प्रधानमन्त्री कार्की, प्रधानन्यायाधीश प्रकाशमानसिंह राउत, प्रतिनिधिसभाका सभामुख देवराज घिमिरे, मन्त्रीगण, प्रनिधिसभाका उपसभामुख इन्दिरा राना, संवैधानिक निकायका प्रमुख तथा पदाधिकारी, नेपाल सरकारका उच्चपदस्थ अधिकृत, सुरक्षा निकायका प्रमुख तथा अधिकारीलगायत उपस्थित थिए।