कृत्रिम खुट्टामा अडिएको सपना, सातै महादेशमा उभिएको नेपाली साहस

 काठमाडौं । शरीरका सीमाभन्दा बलिया सपना हुन्छन् भन्ने उदाहरण फेरि एकपटक नेपालीले विश्वसामु प्रस्तुत गरेका छन् । दुवै खुट्टा घुँडामुनि गुमाए पनि आत्मबल नहारेका हरि बुढामगरले करिब माइनस २५ डिग्री चिसो चिर्दै अन्टार्टिकाको माउन्ट भिन्सनमा उभिएर इतिहास रचेका छन् । यही आरोहणसँगै उनले विश्वका सातै महादेशका अग्ला शिखर चढ्ने लक्ष्य पूरा गरेका छन् ।

समुद्री सतहदेखि ४ हजार ८९२ मिटर उचाइमा रहेको माउन्ट भिन्सन सजिलो गन्तव्य होइन । तीव्र हावा, कठ्याङ्ग्रिदो चिसो र शून्यभन्दा तल झरेको तापक्रमबीच कृत्रिम खुट्टाकै सहारामा शिखरतर्फ अघि बढ्नु आफैंमा असाधारण साहस हो । तर हरि भन्छन्, “शरीरको अङ्ग कमजोर हुँदैमा आत्मा कमजोर हुँदैन । म फरक क्षमता भएका सबैलाई हरेक दिन आफ्नै सपनाको सगरमाथा चढ्न प्रेरित गर्न चाहन्छु।”

रोल्पाको दुर्गम गाउँ मिरुलमा जन्मिएका पूर्व गोर्खा हरि बुढामगर आज विश्व पर्वतारोहण इतिहासमा प्रेरणाको प्रतीक बनेका छन् । आरोहणका क्रममा उनले भोगेको संघर्ष शब्दमा बयान गर्न कठिन छ । “हावाले शरीर हल्लाइरहेको थियो, औँलाहरू जम्दै थिए, अनुहार पोलिरहेजस्तो लाग्थ्यो,” उनी सम्झन्छन्, “घरीघरी आफैंप्रति शंका उठ्थ्यो, तर मनभित्र कतै न कतै पुगेरै छाड्छु भन्ने विश्वास बलियो थियो।”

उनका अनुसार यो उपलब्धि कुनै एक दिनको मेहनत होइन । निरन्तर अभ्यास, मानसिक दृढता र असफलतासँग जुध्ने आँटले मात्र यस्तो लक्ष्य सम्भव भएको हो । युद्धमा गम्भीर घाइते भएर जीवन र मृत्युबीच संघर्ष गरेको अनुभवले उनलाई हरेक चुनौती सामना गर्न तयार बनाएको उनले सुनाए ।

माउन्ट भिन्सनको शिखरमा उभिँदा देखिएको दृश्य उनको जीवनकै अविस्मरणीय क्षण बनेको छ । “आँखाले भ्याएसम्म हिउँ नै हिउँ थियो, स्वर्गजस्तै लाग्यो,” उनले भावुक हुँदै भने । त्यही क्षण नेपाली झण्डा फहराउँदा आफू मात्र होइन, सिंगो नेपाल गर्वले उचालिएको अनुभूति भएको उनको भनाइ छ ।

यसअघि हरिले सगरमाथा, अफ्रिकाको किलिमन्जारो, उत्तर अमेरिकाको डेनाली, दक्षिण अमेरिकाको एकोनकागुआ, युरोपको मोन्ट ब्ल्याङ्क र ओसियानियाको पुन्चाक जयुजस्ता शिखरहरूमा पाइला टेकेका छन् । दुवै खुट्टा गुमाएर पनि सातै महादेशका अग्ला चुचुरो चढ्ने उपलब्धिले उनलाई विश्वकै अद्वितीय पर्वतारोहीको सूचीमा उभ्याएको छ ।

कृत्रिम खुट्टामा अडिएर विश्वका शिखरहरू जितेका हरि बुढामगरको यात्रा केवल आरोहणको कथा होइन, यो असम्भवलाई सम्भव बनाउने आत्मविश्वास र साहसको कथा हो—जसले भन्छ, संघर्ष पार गरेपछि सधैं उज्यालो समय आउँछ।