नेपाली चलचित्र बजारको नयाँ कीर्तिमान: २६ वर्षमा ३१ फिल्मले पार गरे ७ करोडको कमाइ

काठमाडौं । नेपाली चलचित्र उद्योगको व्यावसायिक विस्तार झल्काउने तथ्यांक सार्वजनिक गर्दै चलचित्र विकास बोर्डले पछिल्लो २६ वर्षमा ७ करोड रुपैयाँभन्दा बढी ग्रस कलेक्सन गर्ने ३१ नेपाली चलचित्रको आधिकारिक सूची सार्वजनिक गरेको छ।

बोर्डको २६औँ वार्षिकोत्सवको अवसरमा सार्वजनिक गरिएको विवरणअनुसार नेपाली चलचित्र इतिहासमा सर्वाधिक व्यापार गर्ने फिल्महरूको अभिलेख पहिलोपटक एकीकृत रूपमा सार्वजनिक गरिएको हो। सूची २६ वर्षको अवधिमा संकलित भए पनि यसले नेपाली चलचित्रको करिब ६ दशक लामो इतिहासका सबैभन्दा सफल फिल्महरूको व्यावसायिक उपलब्धि समेटेको बोर्डको भनाइ छ।

सबैभन्दा धेरै कमाइ गर्ने चलचित्रको शीर्ष स्थानमा ‘पूर्णबहादुरको सारंगी’ रहेको छ। २०८१ सालमा प्रदर्शनमा आएको यस चलचित्रले ४६ करोड ८७ लाख रुपैयाँभन्दा बढी ग्रस व्यापार गर्दै नेपाली चलचित्र उद्योगमा नयाँ कीर्तिमान बनाएको छ।

दोस्रो स्थानमा ‘कबड्डी ४’ रहेको छ, जसले २१ करोड ४० लाख रुपैयाँ कमाएको छ। त्यसपछि ‘१२ गाउँ’ ले १९ करोड ९२ लाख रुपैयाँ, ‘परान’ ले १७ करोड ७६ लाख रुपैयाँ र ‘छक्का पञ्जा ४’ ले १७ करोड ५३ लाख रुपैयाँ कमाइ गर्दै शीर्ष पाँचमा स्थान सुरक्षित गरेका छन्।

७ करोडभन्दा बढी व्यापार गर्ने नेपाली चलचित्र

बोर्डको विवरणअनुसार सूचीमा समावेश भएका अधिकांश चलचित्र २०७० सालपछि प्रदर्शनमा आएका हुन्। अपवादका रूपमा ‘आगो’ मात्र २०५८ सालमा प्रदर्शन भएको चलचित्र हो, जसले अहिले पनि सर्वाधिक कमाइ गर्ने नेपाली चलचित्रको सूचीमा आफ्नो स्थान कायम राख्न सफल भएको छ।

चलचित्र विकास बोर्डले यस्तो अभिलेखले नेपाली चलचित्र उद्योगको आर्थिक आकार, बजार विस्तार, दर्शकको रुचि र व्यावसायिक प्रवृत्तिलाई व्यवस्थित रूपमा दस्तावेजीकरण गर्न महत्वपूर्ण भूमिका खेल्ने विश्वास व्यक्त गरेको छ।