नाफामा सांग्रिलाको छलाङ, एक वर्षमै ८९ करोड नाघ्यो खुद आम्दानी

काठमाडौं । सांग्रिला डेभलपमेन्ट बैंक लिमिटेडले आर्थिक वर्ष २०८२/८३ को चौथो त्रैमाससम्म उत्साहजनक वित्तीय प्रदर्शन गरेको छ। बैंकले समीक्षा अवधिमा ८८ करोड ९९ लाख रुपैयाँ खुद नाफा आर्जन गरेको छ, जुन अघिल्लो वर्षको सोही अवधिको तुलनामा ४६.६९ प्रतिशतले बढी हो। गत वर्ष यस अवधिसम्म बैंकको नाफा ६० करोड ६७ लाख रुपैयाँ थियो।

बैंकको प्रमुख आम्दानी स्रोत खुद ब्याज आम्दानीमा पनि उल्लेख्य वृद्धि देखिएको छ। एक वर्षको अवधिमा यो रकम २०७ करोड १५ लाख रुपैयाँबाट बढेर २४२ करोड १ लाख रुपैयाँ पुगेको छ। यससँगै सञ्चालन नाफा ८८ करोड ४४ लाख रुपैयाँबाट बढेर १ अर्ब ३५ करोड ३० लाख रुपैयाँ पुगेको छ, जसले ५२.९८ प्रतिशतको वृद्धि जनाएको छ।

बैंकको नाफा वृद्धिमा कर्जा नोक्सानी व्यवस्थापन खर्च (इम्पेयरमेन्ट चार्ज) घट्नु प्रमुख कारण बनेको देखिन्छ। अघिल्लो वर्ष ३४ करोड ५५ लाख रुपैयाँ रहेको यस्तो खर्च घटेर ९ करोड १४ लाख रुपैयाँमा सीमित भएको छ। यसले बैंकको वित्तीय नतिजामा सकारात्मक प्रभाव पारेको छ।

यद्यपि, कर्मचारीतर्फको खर्च भने बढेको छ। बैंकको पर्सनेल खर्च ७४ करोड ५२ लाख रुपैयाँबाट बढेर १ अर्ब २ करोड रुपैयाँ पुगेको छ।

व्यावसायिक विस्तारतर्फ बैंकले निक्षेप र कर्जा दुवैमा वृद्धि कायम राखेको छ। निक्षेप ४.१२ प्रतिशतले बढेर ५६ अर्ब ९२ करोड रुपैयाँ पुगेको छ भने कर्जा प्रवाह ७.१२ प्रतिशतले वृद्धि भई ४५ अर्ब ८७ करोड रुपैयाँ पुगेको छ।

वित्तीय सूचकहरू पनि सुधारोन्मुख देखिएका छन्। पूँजी पर्याप्तता अनुपात (CAR) १४.६३ प्रतिशत पुगेको छ भने कस्ट अफ फन्ड ५.०१ प्रतिशतबाट घटेर ३.५४ प्रतिशतमा झरेको छ। यसले बैंकको स्रोत व्यवस्थापन अझ प्रभावकारी बनेको संकेत गर्छ।

तर, निष्क्रिय कर्जा (एनपीएल) भने बढ्दो क्रममा छ। अघिल्लो वर्ष ५.५२ प्रतिशत रहेको एनपीएल बढेर ६.८७ प्रतिशत पुगेको छ। यसले आगामी दिनमा बैंकको सम्पत्ति गुणस्तर व्यवस्थापनमा चुनौती थप्न सक्ने संकेत दिएको छ।

प्रति शेयर आम्दानी (EPS) १७.०६ रुपैयाँबाट बढेर २३.८३ रुपैयाँ पुगेको छ भने प्रतिशेयर नेटवर्थ १६९.५० रुपैयाँ पुगेको छ। बजारमा बैंकको शेयर मूल्य प्रतिकित्ता ४०४ रुपैयाँ कायम रहँदा पीई अनुपात १६.९५ गुणा रहेको छ।

विश्लेषकहरूका अनुसार ब्याज आम्दानी, कर्जा विस्तार र इम्पेयरमेन्ट खर्चमा आएको कमीले बैंकको नाफा बलियो बनेको हो। तर बढ्दो निष्क्रिय कर्जा नियन्त्रण गर्न नसके आगामी वर्षमा पुनः जोखिम बढ्न सक्ने देखिन्छ। त्यसैले हालको नाफा वृद्धिलाई दिगो बनाउन बैंकले खराब कर्जा व्यवस्थापनमा विशेष ध्यान दिनुपर्ने आवश्यकता औँल्याइएको छ ।