म्याग्दी — अनुकूल मौसम र दसैँ–तिहारको बिदासँगै म्याग्दीको अन्नपूर्ण गाउँपालिका–४ नारच्याङस्थित अन्नपूर्ण आधार शिविर र मौरिस हर्जोग पदमार्गमा पर्यटकको आवागमन बढेको छ।

अन्नपूर्ण प्रथम हिमालको आधार क्षेत्र, पञ्चकुण्ड ताल र मौरिस हर्जोग पदमार्ग अहिले आन्तरिक तथा बाह्य पर्यटकको आकर्षण बनेका छन्। दसैँपछि दैनिक करिब २०० जनाको हाराहारीमा नेपाली, भारतीय तथा तेस्रो मुलुकका पर्यटक आधार शिविरतर्फ जाने गरेको पदमार्ग अभियन्ता तेज गुरुङले जानकारी दिए।

गत असोजमा आएको मनसुनजन्य विपद्बाट पदमार्गमा ठूलो क्षति नपुगेकाले पर्यटकलाई यात्रा गर्न सहज भएको व्यवसायीहरूको भनाइ छ। बिदाको समय सदुपयोग गर्न युवायुवती तथा रोजगारीमा रहेका व्यक्तिहरू छोटो अवधिको पदयात्राका लागि अन्नपूर्ण आधार शिविर पुग्न थालेपछि पदमार्गमा चहलपहल बढेको हो।

गुरुङका अनुसार पछिल्लो समय पदमार्गमा रहेका रेस्टुरेन्ट तथा क्याम्पहरू पर्यटकले भरिन थालेका छन्।

छोटो यात्रामा हिमालको अनुभव

समुद्री सतहबाट ४ हजार ५० मिटरको उचाइमा रहेको अन्नपूर्ण आधार शिविर छोटो अवधिमा पदयात्रा गर्न सकिने आकर्षक गन्तव्यका रूपमा विकसित हुँदै गएको छ।

म्याग्दी बहुमुखी क्याम्पसकी प्राध्यापक मनिता रायमाझीले आधार शिविरको पारिवारिक भ्रमणपछि दुईदेखि तीन दिनमै पूरा गर्न सकिने यो यात्रा छोटो, साहसिक र रमणीय रहेको अनुभव सुनाइन्।

नारच्याङको दोभान–छोटेपा हुँदै हुमखोलासम्म करिब २० किलोमिटर सवारीसाधनबाट पुग्न सकिन्छ। त्यसपछि करिब २१ किलोमिटर पैदल यात्रा गरेपछि दुई दिनमा अन्नपूर्ण आधार शिविर पुग्न सकिने व्यवस्था छ।

पदमार्गमा थपिँदै पूर्वाधार

पर्यटकको सुविधा बढाउन हुमखोलादेखि आधार शिविरसम्म विभिन्न स्थानमा अस्थायी संरचना निर्माण गरिएका छन्। चिया तथा खाजा पसलसँगै खाना र बासको व्यवस्था हुने होटल तथा आश्रयस्थल सञ्चालनमा छन्।

सन्धीखर्क, भुस्केट मेला र पञ्चकुण्ड ताल क्षेत्रमा आश्रयस्थल निर्माण गरिएको छ। हुमखोला, फुतफुते झरना, गुफाफाँट, भुस्केट र पञ्चकुण्ड क्षेत्रमा खानेपानी तथा शौचालयलगायतका पूर्वाधार पनि तयार पारिएका छन्।

संघीय, प्रदेश र स्थानीय तहको बजेटबाट पदमार्ग तथा झोलुङ्गे पुलको मर्मतसम्भारसमेत गरिएको छ।

मौरिस हर्जोगको सम्झना

अन्नपूर्ण आधार शिविर क्षेत्रमा पहिलो आरोही मौरिस हर्जोग, लुइस लचेनल र नेपाली सहयोगी सोनाम वाङ्चुक शेर्पाको सालिक राखिएको छ। उनीहरूको सम्झनामा खुला संग्रहालयसमेत स्थापना गरिएको छ।

गत साता पदमार्गको प्रवेशद्वार बाँसबोटमा पर्यटक सूचना केन्द्र स्थापना गरिएको छ। पहिलो आरोही मौरिस हर्जोगको नामबाटै यस पदमार्गको नामकरण गरिएको अन्नपूर्ण गाउँपालिका–४ का वडाध्यक्ष लोकबहादुर फगामीले बताए।

प्राकृतिक आकर्षणले थप्छ पदयात्राको रोमाञ्च

‘जेठो हिमाल’का रूपमा चिनिने अन्नपूर्ण प्रथमको आधार क्षेत्रमा पुग्ने क्रममा पर्यटकले फुतफुते झरना, पञ्चकुण्ड ताल र हिमाली दृश्यको अवलोकन गर्न पाउँछन्।

प्राकृतिक सौन्दर्यसँगै साहसिक पदयात्रा, हिमाली वातावरण र छोटो समयमै आधार शिविर पुग्न सकिने विशेषताले मौरिस हर्जोग पदमार्गलाई पछिल्लो समय लोकप्रिय बनाउँदै लगेको छ।

अन्नपूर्ण आधार शिविरमा बढेको पर्यटक चहलपहलसँगै बेनी, भुरुङ–तातोपानी र नारच्याङका पर्यटन व्यवसायीसमेत उत्साहित भएका छन्। आगामी दिनमा पर्यटकको आगमन बढ्दै गएमा यस क्षेत्रको होटल, यातायात तथा स्थानीय पर्यटन व्यवसायमा थप सकारात्मक प्रभाव पर्ने अपेक्षा गरिएको छ।