आफ्नै घरबाट पक्राउ परे व्यवसायी दुर्गा प्रसाईं
६ असोज, काठमाडौं । आफूलाई सामाजिक अभियान्ता भन्न रुचाउने मेडिकल व्यापसायी दुर्गा प्रसाईं पक्राउ परेका छन् ।
विद्युतीय कारोबार ऐन अन्तर्गत पक्राउ पूर्जी जारी भएपछि प्रहरीले उनलाई भक्तपुरस्थित आफ्नै निवसाबाट पक्राउ गरेको हो ।
साइबर ब्यूरोबाट खटिएको टोलीले र जिल्ला प्रहरी परिसर भक्तपुरको सहयोगमा प्रसाईंलाई पक्राउ गरेको साइबर ब्यूरोका प्रमुख डीआईजी नवीन्द अर्यालले जानकारी दिए ।
प्रसाईंलाई पक्राउ गर्न प्रहरी भक्तपुरको मध्यपुर थिमी नगरपालिका–६ कमेरोटारस्थित उनको घरमै गएको थियो । घरको गेट नै नखोलेपछि कमाउण्ड नाघेर भित्र प्रवेश गरी प्रहरीले उनलाई नियन्त्रणमा लिएको हो ।
साइबर ब्यूरोमा उनीविरुद्ध जाहेरी परेपछि जिल्ला अदालत, काठमाडौंले प्रसाईंलाई पक्राउ गरेर अनुसन्धान गर्न प्रहरीलाई अनुमति दिएको थियो ।
पछिल्लो समय साइबर अपराधका नाममा सामाजिक सञ्जालमा सवाल जवाफ गरेकै भरमा प्रतिष्ठित व्यक्तिहरुलाई पक्राउ गरेर अनुसन्धान गर्न थालिएको छ ।
