नवौं लुम्बिनी प्रदेशस्तरीय प्रदर्शनीमा बाँके, बर्दिया, सुर्खेत, दाङ, प्युठान, रोल्पा, पुर्वीरुकुम र सल्यानका महिला उद्यमीका स्टल
टुरिमजफेस
नेपालगन्ज । नवौं लुम्बिनी प्रदेशस्तरीय प्रदर्शनीमा बाँके, बर्दिया, सुर्खेत, दाङ, प्युठान, रोल्पा, पुर्वीरुकुम र सल्यानका उद्यमी महिलाका स्टलले धेरैलाई लोभ्याएको छ । ती स्टलमा पुग्नेहरूले महिलाहरूले तयार पारेका विभिन्न उत्पादनको बारेमा जानकारी लिए ।
महिला उद्यमीहरूको उत्पादनलाई प्रवद्र्धन र बजारीकरणको लागि नयाँ सम्भावनाको उजागर गर्ने उद्देश्यले महिला उद्यमी संघ बाँकेको आयोजनामा फागुन ६ देखि १० गतेसम्म नेपालगन्जमा प्रदर्शनीको आयोजना गरिएको थियो । महिलाहरूले उत्पादन गरेका वस्तु तथा उत्पादनको बजारीकरणको लागि संघले हरेक वर्ष प्रदर्शनीको आयोजना गर्ने गरेको छ ।
प्रदर्शनीको समापन कार्यक्रमलाई सम्बोधन गर्दै लुम्बिनी प्रदेश सभा सदस्य अम्बिका काफ्लेले सरकारले गर्ने काम बाँकेका उद्यमी महिलाहरूले गरिरहेको बताइन् । नेपालगन्ज उपमहानगरपालिकासँगको सहकार्य र केएल दुगडको मुख्य प्रायोजनमा भएको प्रदर्शनीका अवसरमा महिला उद्यमीका समस्या, चुनौति र सम्भावनाको बारेमा संवाद, महिला उद्यमीका सफलताबारे छलफल गरिएको थियो ।
संघकी अध्यक्ष साबित्रा पोखरेल बस्नेतले महिला उद्यमीहरूलाई आर्थिक रूपमा सक्षम बनाउनको लागि प्रदर्शनीको आयोजना गरिएको बताइन् । संंघकी प्रथम उपाध्यक्ष रेवती सिंहले महिलाहरूमा नयाँ उत्साह जगाउने काम प्रदर्शनीले गरेको बताइन् । लुम्बिनी प्रदेश संयोजक सरस्वती शर्माले महिला उद्यमीहरूले उत्पादन गरेको वस्तुलाई अन्तर्राष्ट्रिय स्तरमा बिक्री गर्नको लागि प्रदर्शनीले माध्यमको रूपमा काम गरेको धारणा राखिन् ।
