बिबी एयरवेजः ‘एनओसी’ लिएको एक वर्ष बित्यो, जहाज आएनन्

टुरिजमफेस
काठमाडौं । गैरआवासीय नेपाली संघका पूर्वअध्यक्ष भवन भट्ट अध्यक्ष रहेको बिबी एयरवेजले जहाज ल्याउनका लागि ‘एनओसी’ लिएको १ वर्ष पूरा हुन अब एक साता बाँकी छ । भट्टको बिबी एयरवेजलाई नेपाल नागरिक उड्डयन प्राधिकरणले सन् २०२४ मार्च १२ मा तीनवटा एयरबस खरिद तथा भाडामा ल्याउन अनुमति दिएको थियो ।

यस अवधिमा जहाज नल्याएपछि कम्पनीको अस्तित्वमा प्रश्न उठेको छ । सामान्तया कुनै ठूलो समस्या नहुँदाः ‘एनओसी’ पाएको एक वर्षभित्र जहाज ल्याइसक्नु पर्ने नियम छ । त्यतिमात्र होइन ‘एनओसी’ पाएको कम्पनीले एक वर्षमा कम्तीमा दुईवटा जहाज अनिवार्य ल्याउनु पर्छ । तर ती जहाज आउने टुंगो नभएकै अवस्थामा कम्पनीका अध्यक्ष भट्ट प्राधिकरणको सम्पर्कमा नरहेको सम्बद्ध स्रोतले बताएको छ । प्राधिकरणले गत वर्ष लिएको अनुमति सन् २०२५ को मार्च ११ सम्म लागु हुने उल्लेख गरेको थियो ।

कम्पनी स्रोतका अनुसार यसअवधिमा भट्टले लगानीकर्ताबाट रकम उठाउन नसकेपछि जहाज खरिदमा समस्या भएको हो । उनले जहाज ल्याउन अनुमति पाएपछि नेपाली तथा विदेशी लगानीकर्तासँग छलफल गरेका थिए । एनओसी पाउने बेला भने उनले ६ महिनामा दुईवटा जहाज ल्याएर उडान सुरु गर्ने सार्वजनिक रूपमा बताएका थिए । प्राधिकरणले एनओसी पाएको एक वर्षमा जहाज ल्याउन नसक्दा स्वतः एनओसी रद्द हुने जनाएको छ । वि.सं. २०६८ मा स्थापना भएको कम्पनीले त्यसको एक वर्षपछि २०६९ भदौ २८ गते काठमाडौंबाट अन्तर्राष्ट्रिय उडान सुरु गरेको थियो । कम्बोडियाको टोन्ले साप एयरलाइन्ससँग बोइङ ७५७–२०० सिरिजको जहाज भाडामा लिएर उडान गरेको थियो तर तीन महिनामै उडान बन्द गरेको थियो । जसका कारण कम्पनीको एओसी निलम्बनमा परेको थियो ।

पछि एयरबस जहाज ल्याएर उडान गर्ने गरी अन्तर्राष्ट्रिय एयरलाइन्स सञ्चालनको लाइसेन्स नवीकरण गरेको थियो । दुई एयरबस ल्याएर उडान सुरू गर्ने योजना बनाएको कम्पनीले कुल २ अर्ब ५३ करोड रूपैयाँ लगानी हुने योजनासमेत गरेको थियो र केही कर्मचारी भर्ना गरिसकेको थियो ।