नेपालमा पहिलो पटक डिजिटल नोम्याड सम्मेलन, के हुन्छ लाभ ?
टुरिजमफेस
पोखरा । नेपाललाई डिजिटल नोम्याडका लागि विश्वकै आकर्षक गन्तव्यको रूपमा प्रस्तुत गर्न पोखरामा ‘नोम्याड बेसक्याम्प’ आयोजना गरिएको छ । नेपाल पर्यटन बोर्डले साराङसँगको सहकार्यमा आयोजना पहिलोपटक ‘डिजिटल नोम्याड समिट– बेसक्याम्प नोम्याड’ आयोजना गरिएको हो ।
अगस्त २७ देखि ३१ सम्म सञ्चालन भएको नोम्याड बेसक्याम्पलाई सम्वोधन गर्दै पाल पर्यटन बोर्डका प्रमुख कार्यकारी अधिकृत दीपकराज जोशीले यो पहल नेपाल पर्यटनको नयाँ अध्याय भएको बताएका छन् । उनले यो समिटबाट नेपालले आफूलाई विश्वसामु प्रस्तुत गर्ने नयाँ अध्यायको सुरुवात गरेको बताए । “प्राकृतिक सुन्दरता, सांस्कृतिक गहिराइ, मानवीय आतिथ्य र सुरक्षित वातावरणका कारण नेपाल डिजिटल नोम्याडहरूको लागि उत्कृष्ट गन्तव्य बन्न सक्छ,” उनले भने ।
पोखरा आफैंमा विश्व ब्रान्ड बनिसकेको उल्लेख गर्दै शान्त ताल, हिमालको सौन्दर्य र जीवन्त जीवनशैलीसहित यसलाई प्रविधि–मैत्री संरचना, को–वर्किङ स्पेस र स्वागतयोग्य वातावरणसँग जोड्दा डिजिटल नोम्याड्सका लागि नेपाल उत्कृष्ट गन्तव्य बन्न सक्ने बताइएको छ ।
पहिलो डिजिट नोम्याड समिटमा ३० भन्दा बढी अन्तर्राष्ट्रिय डिजिटल नोम्याड र ४० भन्दा बढी नेपाली सहभागी भएका छन् । यसले नेपाल केवल भ्रमणको गन्तव्य मात्र नभई सिर्जना, सहकार्य र नयाँ अर्थतन्त्रमा योगदान गर्ने थलोको रूपमा स्थापित हुन सक्ने सन्देश दिएको पनि जोशीले बताए ।
