लाङटाङ सुरुङमा फसेका भनिएका २५ जनाको उद्धारमा चुनौती, सेना टोली फर्कियो

काठमाडौं — रसुवाको २० मेगावाट क्षमताको लाङटाङ खोला जलविद्युत् आयोजनाको सुरुङमा फसेका भनिएका करिब २५ जनाको उद्धार तत्काल अघि बढाउन कठिनाइ भएको छ। उद्धारका लागि खटिएको नेपाली सेना तथा प्राविधिकसहितको टोली सुरुङभित्र ठूला ढुंगा भेटिएपछि फर्किएको छ।

उद्धार टोलीले सोमबार बिहानदेखि सुरुङभित्र प्रवेश गरेर खोजी थाले पनि करिब १०० मिटरभन्दा अगाडि बढ्न सकेन। करिब १५० मिटरभित्र पुग्नुपर्ने अवस्थामा बाटोमै ठूला बोल्डर भेटिएपछि थप उपकरण र प्राविधिक जनशक्ति आवश्यक देखिएको हो।

आयोजनाका प्रबन्ध निर्देशक विजयमोहन भट्टराईका अनुसार उद्धारमा नेपाली तथा भारतीय सेनाका प्राविधिकसहित करिब १८–१९ जनाको टोली परिचालन गरिएको थियो। तर सुरुङभित्रको भौतिक अवरोधका कारण टोलीलाई तत्कालका लागि फिर्ता बोलाइएको हो।

अब आयोजनाले आफ्नै प्राविधिक जनशक्ति परिचालन गरेर उद्धार तथा खोजी कार्यलाई निरन्तरता दिने भएको छ। कम्पनीले मंगलबारदेखि प्राविधिक टोलीलाई सुरुङभित्र पठाएर अवरोध हटाउने र फसेका भनिएका व्यक्तिको अवस्थाबारे यकिन गर्ने तयारी गरेको छ।

आयोजना व्यवस्थापनका अनुसार खोजी तथा उद्धारमा अझै एक–दुई दिन लाग्न सक्ने अनुमान छ। आवश्यक परेको अवस्थामा अन्तिम चरणमा नेपाली सेनाको सहयोग पुनः लिइनेछ।

सुरुङभित्र फसेका भनिएका व्यक्तिहरूको अवस्था भने अहिलेसम्म स्पष्ट हुन सकेको छैन। खोजी टोलीले सुरुङभित्रको अवरोध हटाउँदै उनीहरूको अवस्थाबारे जानकारी जुटाउने प्रयास गरिरहेको छ।