४ दिनको अन्तरालमा नेपालका दुई ठूला होटल सञ्चालकको निधन, अम्बिकापछि पाण्डेपनि रहेनन्
काठमाडौं । ४ दिनको अन्तरमा नेपालका दुई ठूला होटल सञ्चालकको निधन भएको छ ।
गत बिहिबार द्वारिकाज होटलकी संस्थापक अम्बिका श्रेष्ठको निधन भएको थियो भने त्यसको ४ दिनपछि सांग्रिला होटलका संस्थापक श्याम बहादुर पाण्डेको पनि निधन भएको छ ।
होटल संघ नेपालका पूर्व अध्यक्ष समेत रहेका सांग्रिला होटलका संस्थापक पाण्डेको साउन ७ गते सोमबार निधन भएको हो ।
पाण्डेले विक्रम सम्वत २०१८ सालमै पाँचतारे होटेल सांग्रिला खोलेका थिए । उनी निजामती सेवा छोडेर पर्यटन क्षेत्रमा प्रवेश गरेका थिए । पछिल्लो समय उनका छोराहरूले होटलको व्यवस्थापन हेर्दै आएका छन् ।
मुलुकमा अन्तर्राष्ट्रिय स्तरको सुविधा सम्पन्न तारे होटल तथा रिसोर्ट सञ्चालन गरी अन्तर्राष्ट्रिय पर्यटन प्रवर्द्धनमा योगदान गरेबापत उनले राष्ट्रिय तथा अन्तर्राष्ट्रिय पदक तथा सम्मानहरू समेत पाएका थिए ।
