त्रिभुवन विमानस्थलमा सौर्य एयरलाइन्सको जहाज दुर्घटना, पोखरा जाँदै थिए १९ जना
९ साउन, काठमाडौं । त्रिभुवन अन्तर्राष्ट्रिय विमानस्थल काठमाडौंमा सौर्य एयरलाइन्सको जहाज दुर्घटना भएको छ ।
सौर्यको ९ एन-एएमई/सीआरजे २०० कलसाइनको जहाज बुधबार बिहान धावनमार्ग छोड्नासाथ दुर्घटनामा परेको हो ।
जहाज रनवे ०२ तर्फबाट उडेको र पूर्वतर्फ रनवे २० नजिकै दुर्घटनामा परेको विमानस्थलले जनाएको छ ।
जहाजमा रहेका क्याप्टेन ३७ वर्षीय मनीष शाक्यलाई उद्धार गरेर केएमसी अस्पतालमा लगिएको काठमाडौं उपत्यका प्रहरी कार्यालय रानीपोखरीका प्रवक्ता एसएसपी दिनेशराज मैनालीले जानकारी दिए ।
बुधबार बिहान करिब ११ बजे जहाज दुर्घटनामा परेको थियो । जहाजबाट धुवाँ आएको देखिएपछि अग्निनियन्त्रक, प्रहरी र नेपाली सेना परिचालन गरिएको थियो ।
जहाजमा १९ जना यात्रु रहेका खुलेको छ । दुर्घटनाको विस्तृत विवरण भने आउन बाँकी छ ।
