मुलुकमै गरिखाने वातावरण कसले बनाउने !

टुरिजमफेस
काठमाडौं । श्रम, रोजगार तथा सामाजिक सुरक्षा मन्त्री शरतसिंह भण्डारीले मुलुकमै गरिखाने वातावरण बनाउन आवश्यक रहेको बताएका छन् । काठमाडौंमा आयोजित व्यवसाय र मानव अधिकारका दृष्टिकोणः श्रम आप्रवासन व्यवस्थापन सम्बन्धी नीतिगत छलफल कार्यक्रममा बोल्दै मन्त्री भण्डारीले भने, ‘अहिले वैदेशिक रोजगारीमा जाने क्रम बढेको छ । यस्तो किन भइरहेको छ ? के अहिलेको आवश्यकता यस्तै हो ?’
वैदेशिक रोजगारीमा जानुपर्ने आवश्यकता नै हो भने सीप सिकेर मात्र वैदेशिक रोजगारीमा जाने व्यवस्था हुनुपछ्र्र र सरकारको प्राथमिकता पनि सीप सिकाउनमै जोड रहेको उनको भनाइ छ । पछिल्लो समयमा वैदेशिक रोजगारीमा जाने क्रम बढे पनि श्रमिकमाथि हुने ज्यादति रोकिएका छैनन् । श्रमिकले पाउने न्यायमा जोड दिँदै सरकारले व्यवसाय र मानव अधिकार कार्ययोजना तयार पारेको छ । सोही कार्ययोजना कार्यन्वयनमा केन्द्रित रहँदै विभिन्न विज्ञ व्यक्तिहरूको सहभागितामा उक्त कार्यक्रमको आयोजना गरिएको हो । श्रमिकले भोगिरहेका समस्या तथा विभिन्न नीतिगत विषयबारे कार्यक्रममा श्रम अधिकारको पक्षमा काम गर्दै आएका व्यक्तिहरूले प्रस्तुतिकरण समेत गरेका थिए ।