सहकारीको रकम अपचलन : रविका साझेदार छवीलाल पक्राउ, के लामिछाने पनि पक्राउ पर्दैछन् ?
काठमाडौं । सहकारी बचत रकम ठगी प्रकरणमा गोरखा मिडिया नेटवर्कका तत्कालीन संचालक छबिलाल जोशी पक्राउ परेका छन् ।
नेपाल प्रहरीका पूर्वडीआईजीसमेत रहेका जोशीलाई आइतबार काठमाडौं उपत्यका अपराध अनुसन्धान कार्यालयको टोलीले काठमाडौंको शंखमुलबाट पक्राउ गरेको हो ।
कास्की प्रहरीको पत्रका आधारमा उनलाई पक्राउ गरेको र उनलाई कास्की प्रहरीमै पठाउने तयारी गरिएको छ । सहकारीको ६५ करोड बचत रकम गोरखा मिडियामार्फत् अपचलन गतिविधिमा जोशी संलग्न रहेको संसदीय विशेष छानबिन समितिको प्रतिबेदनमा उल्लेख छ ।
सहकारी ठगी प्रकरणमा संसदीय विशेष छानबिन समितिले जोशीलाई समेत दोषी औल्याउँदै कानुन अनुसार कारबाही गर्न सिफारिस गरेको थियो । उनले सहकारीको करोडौं रकम दुरुपयोग गरेको समितिको प्रतिवेदनमा उल्लेख छ । आइतबार नै गृहमन्त्री रमेश लेखकले सहकारीबारे छानबिन समितिले प्रस्तुत गरेको प्रतिवेदन कार्यान्यवन गर्न निर्देशन दिएका थिए ।
सहकारीको बचत रकम अपचलनमा छानबिन समितिले जोशीसहित गोरखा मिडियाका तत्कालीन अध्यक्ष जीबी राई र तत्कालीन प्रबन्ध निर्देशक रवि लामिछानेलाई पनि कारबाही सिफारिस गरेको थियो । गोरखा मिडियामा सहकारीको बचत रकम प्रवाह गर्ने काममा संलग्न रहेका कुमार रम्तेल यस अघि नै पक्राउ परिसकेका छन् । जीबी राई भने धेरै अघिदेखि फरार भइ मलेसियामा बसोबास गर्दै आएका छन् । कारबाही सिफारिस गरिएका मध्ये अब नेपालमा रवि लामिछाने मात्रै उपलब्ध छन् । छवीलाल पक्राउ परेसँगै रवि लामिछाने पनि पक्राउ पर्न सक्ने अड्कल बाजी गरिएको छ ।
