पर्यटक ठगीको आरोपमा तीन जना नियन्त्रणमा, ओभर बिलिङविरुद्ध प्रहरीको कारबाही
काठमाडौं । राजधानीका मनोरञ्जनस्थलमा विदेशी पर्यटकसँग अत्यधिक शुल्क असुल्ने तथा विरोध गर्ने ग्राहकलाई धम्क्याउने गतिविधिमा संलग्न रहेको आरोपमा प्रहरीले तीन जनालाई पक्राउ गरेको छ।
प्रहरीका अनुसार केही डान्सबार, क्लब तथा रेस्टुरेन्टमा विदेशी पर्यटकबाट अस्वाभाविक रूपमा बढी बिल उठाइने र त्यसको विरोध गर्दा दुर्व्यवहार हुने गरेको गुनासोपछि प्रहरी टोली परिचालन गरिएको थियो।
घटनास्थलमा पुगेर स्थिति नियन्त्रणमा लिन खोज्दा केही व्यक्तिले प्रहरीमाथि नै गालीगलौज र हातपातको प्रयास गरेको तथा सर्वसाधारणलाई पनि दुःख दिने व्यवहार देखाएको आरोपमा उनीहरूलाई नियन्त्रणमा लिइएको हो।
पक्राउ पर्नेमा बौद्धस्थित एक डान्सबारका कर्मचारी कुमार पराजुली र रोसन बस्याल तथा तारकेश्वर बस्ने हलिउड डान्स क्लबका व्यवस्थापक सुसान गिरी रहेका छन्।
जिल्ला प्रहरी परिसर काठमाडौंका अनुसार उनीहरूमाथि अभद्र व्यवहारसम्बन्धी कसूरमा अनुसन्धान अघि बढाइएको छ। यसका लागि जिल्ला प्रशासन कार्यालयबाट म्याद थप गरी आवश्यक अनुसन्धान प्रक्रिया जारी रहेको प्रहरीले जनाएको छ।
पर्यटन क्षेत्रको छविमा असर पार्ने गरी विदेशी पाहुनामाथि हुने ठगी र दुर्व्यवहारका घटनाप्रति प्रहरी कडा रूपमा प्रस्तुत भएको बताइएको छ। अधिकारीहरूका अनुसार पर्यटकलाई लक्षित गरी हुने यस्ता गतिविधि नियन्त्रण गर्न निगरानी र कारबाहीलाई थप प्रभावकारी बनाइनेछ।
