माओवादी र समाजवादीबाट नियुक्त भएकालाई फिर्ता बोलाउँदै डेढ दर्जन मुलुकमा राजदूत सिफारिस

टुरिजमफेस
काठमाडौं । नेकपा माओवादी र समाजवादी पाटीको कोटाबाट नियुक्त पाएका राजदूतलाई फिर्ता बोलाउँदै केपी शर्मा ओली नेतृत्वको सरकारले डेढ दर्जन मुलुकमा राजदूत सिफारिस गरेको छ । जस अनुसार भारतका लागि शंकर शर्मा, अमेरिकाका लागि लोकदर्शन रेग्मी र चीनका लागि कृष्णप्रसाद ओली सिफारिस भएका छन् ।
  त्यस्तै चन्द्रप्रसाद घिमिरे (बेलायत), शैल रुपाखेती (जर्मनी), नरेशविक्रम ढकाल (साउदी अरब), धनप्रसाद पण्डित (इजरायल), कपिल श्रेष्ठ (दक्षिण अफ्रिका), शिवमाया तुम्बाहाङ्फे (दक्षिण कोरिया) का लागि राजदूत सिफारिस गरिएको छ । सरकारले पोर्चुगलमा प्रकाशमणि पौडेल, पाकिस्तानमा रिता धिताल, अस्ट्रेलियामा कान्ता रिजाल, स्पेनमा सनिल नेपाल, मलेसियामा नेत्रप्रसाद तिमिल्सिना, डेनमार्कमा सुम्निमा तुलाधर, रुसमा जंगब चौहान, श्रीलंकामा रामकृष्ण भट्टराईलाई सिफारिस गरेको छ ।

यसअघिको दाहाल सरकारले जेठ २४ मा भारत र अमेरिकालगायत ११ मुलुकका राजदूतलाई कार्यकाल पूरा नहुँदै फिर्ता बोलाउने निर्णय गरेको थियो । त्यसपछि असार ७ मा विभिन्न ८ मुलुकका लागि नयाँ राजदूत सिफारिस गरेको थियो । तर, ओली सरकारले अघिल्लो सरकारबाट सिफारिस भएका राजदूतमा फेरबदल गरेको छ । २०७८ साउन पहिलो साता त्यसअघिको ओली सरकारले नियुक्त गरेका ९ राजदूतलाई संसदीय सुनुवाइ नहुँदै कांग्रेस–माओवादी गठबन्धनको शेरबहादुर देउवा नेतृत्वको सरकारले फिर्ता गरेको थियो । संसदीय सुनुवाइ पूरा भएपछि मात्र सम्बन्धित मुलुकमा एग्रिमो (स्वीकृति) पठाउने गरिन्छ । एग्रिमो स्वीकृत भएर आएपछि मात्र राजदूत नियुक्त हुने व्यवस्था छ ।