अमेरिकाले दियो नेपालमा एमसीसी परियोजना फेरि सुरु गर्ने अनुमति
टुरिजमफेस
काठमाडौं । अमेरिकी सरकारले नेपालमा मिलेनियम च्यालेन्ज कर्पोरेसन (एमसीसी) परियोजना सुरु गर्न अनुमति प्रदान गरेको छ ।
मिलेनियम च्यालेन्ज एकाउन्ट नेपाल विकास समिति (एमसीए नेपाल) ले अमेरिकी सरकारले एमसीसीअन्तर्गतका परियोजना फेरि अघि बढाउन अनुमति प्रदान गरेको जानकारी दिएको छ ।
डोनाल्ड ट्रम्प अमेरिकाको राष्ट्रपतिमा निर्वाचित भएर आएपछि सबै प्रकारका विदेशी अनुदान स्थगन गरेका थिए । यसै क्रममा एमसीसी परियोजना पनि स्थगित भएको थियो । ‘अमेरिकी सरकारले एमसीसी नेपाल कम्प्याक्ट अन्तर्गतका केही कार्य अगाडि बढाउन अनुमति प्रदान गरेको छ,’ एमसीए नेपालले जारी गरेको विज्ञप्तिमा भनिएको छ, ‘यस अनुमतिले समीक्षाबाट निस्किने कुनै निश्चित परिणामप्रति कुनै संकेत गर्दैन ।’ यद्यपि एमसीसी तीन महिनालाई स्थगित गर्ने भनिएको समयसीमा भने अझै बाँकी छ ।
एमसीसीले गत फागुन २ मा नेपाल सरकारलाई पत्राचार गरेर भुक्तानी रोक्ने जानकारी दिएको थियो । अहिले त्यही स्थगित परियोजना पुनः सुरु हुन लागेको एमसीएले जनाएको छ ।
२०७४ भदौ २९ मा नेपाल सरकार र एमसीसीबीच भएको सम्झौता अनुसार २०८० भदौ १३ देखि परियोजना कार्यान्वयन सुरु भएको थियो । सुरुआती सम्झौतामा ६९ करोड ७० लाख डलर (करिब ९२ अर्ब) परियोजनामा अमेरिकी सरकारले ५० करोड डलर र नेपाल सरकारले १९ करोड ७० लाख डलर व्यहोर्ने भनिएको छ । गत पुसमा अमेरिकी सरकारले परियोजनाका लागि थप ५ करोड डलर दिने घोषणा गरेको थियो । युएसएडका कतिपय कार्यक्रम भने खारेज भइसकेका छन् ।
