त्रिभुवन अन्तर्राष्ट्रिय विमानस्थल दैनिक १८ घण्टा सञ्चालनमा, भैरहवा र पोखरामा कस्तो असर पर्ला ?

टुरिजमफेस
काठमाडौं । त्रिभुवन अन्तर्राष्ट्रिय विमानस्थल दैनिक १८ घण्टा सञ्चालनमा आएको छ । विमानस्थलको क्षमता अभिवृद्धिका लागि गत कात्तिक २३ देखि चैत १८ गतेसम्म दैनिक १० घण्टा विमानस्थल बन्द गरेर भौतिक संरचना निर्माणको काम गरिएको थियो । अबदेखि बिहान ६ देखि राति १२ बजेसम्म खुला रहने विमानस्थलका महाप्रबन्धक जगन्नाथ निरौलाले जानकारी दिए । उनका अनुसार विमानस्थलका ट्याक्सी–वेलाई धावनमार्गसँग जोड्ने लिक–वेको निर्माण सम्पन्न भएको छ ।

समानान्तर ट्याक्सी–वे निर्माणको काम भने जारी छ । नेपाल नागरिक उड्डयन प्राधिकरणअन्तर्गतको हवाई यातायात क्षमता अभिवृद्धि आयोजनाले विमानस्थलको दक्षिण–पश्चिमतर्फ समानान्तर ट्याक्सी–वे, उत्तरतर्फको इन्टरनेसनल एप्रोन र विमानस्थलको पूर्वतर्फको ह्यांगर एप्रोन लगायत विस्तारको काम गरिरहेको छ ।

यी काम पूरा गर्न करिब १५ अर्ब रूपैयाँ खर्च हुने आयोजनाले जनाएको छ । हालसम्म ९० प्रतिशत काम सम्पन्न भएको आयोजना प्रमुख दीपेन्द्र श्रेष्ठले बताए । रातिको समयमा गर्नुपर्ने विमानस्थलको भौतिक संरचनाको काम करिब सकिए पनि आयोजनाको सम्पूर्ण काम सक्न भने अझै साढे एक वर्ष लाग्ने आयोजनाले जनाएको छ ।

त्रिभुवन अन्तर्राष्ट्रिय विमानस्थल सञ्चालनको समय बढेसँगै गौतम बुद्ध अन्तर्राष्ट्रिय विमानस्थल भैरहवाबाट हुने उडान संख्या भने कटौती हुन थालेका छन् । प्राधिकरणका सूचना अधिकारी ज्ञानेन्द्र भुलले वायुसेवा कम्पनीले भैरहवामा लोड पुगेन भन्ने गुनासो गरेको बताए । उनले भने, ‘निश्चित अवधिसम्म हामीले पनि बाध्यकारी बनायौं,’ ‘तर, निरन्तर घाटामा उडाइराख्न भन्ने नैतिक धरातल प्राधिकरणसँग पनि छैन ।’ यद्यपि पछिल्लो समयमा गौतमबुद्ध अन्तर्राष्ट्रिय विमानस्थलमा यात्रु संख्या भने उल्लेख्य रूपमा बढेका थिए । ‘जनवरीको तुलनामा फेब्रुअरी र फेब्रुअरीको तुलनामा मार्चमा यात्रु संख्या बढेका छन्,’ विमानस्थलका महाप्रबन्धक प्रतापबाबु तिवारीले भने, ‘यात्रु संख्या उत्साहजनक भइरहेको बेला धमाधम एयरलाइन्सले उडान झिकेका छन् ।’

गौतमबुद्ध विमानस्थलका अनुसार मार्चमा ७ हजार ३४ अन्तर्राष्ट्रिय यात्रुले अवतरण गरेका छन् । त्यसअघि फेब्रुअरीमा ६ हजार ७ सय ७९ र जनवरीमा १ हजार ३ सय ६५ यात्रु अवतरण भएका थिए ।

सरकारले गौतमबुद्ध र पोखरा अन्तर्राष्ट्रिय विमानस्थलमा उडान गर्ने वायुसेवा कम्पनीलाई आकर्षक छुट सुविधा दिएको छ । वायुसेवा कम्पनीले काठमाडौंको तुलनामा सस्तो हवाई इन्धन प्राप्त गर्छन् । पार्किङ, ल्यान्डिङदेखि विभिन्न शुल्क छुट गरिएको छ । नेपाल एयरलाइन्सले ग्राउन्ड ह्यान्डलिङ सेवामा भारी छुट दिएको छ । तर, वैदेशिक रोजगारीमा जाने युवाको आवश्यक तयारीका लागि काठमाडौं पुग्नै पर्ने बाध्यता अन्त्य नहुँदा ती विमानस्थलमा चाप बढ्न सकेको छैन । श्रम स्वीकृतिदेखि मेडिकलसम्मका लागि काठमाडौं पुग्नुपर्ने बाध्यता अझै छ ।