काठमाडौँको वायु मानवका लागि अति खतरनाक

टुरिजमफेस
काठमाडौँ । काठमाडौं उपत्यकाको वायु  मान्छेका लागि अति खतरनाक अवस्थामा पुगेको छ । पानी नपरेपछि केही दिनदेखि बिग्रन थालेको वायु प्रदुषण सुधार हुन अझै केही दिन लाग्ने मौसमविदहरूले बताएका छन् ।

वायु प्रदुषण खतरनाक तहमा पुग्दा सर्वसाधारणलाई श्वासप्रश्वासदेखि आँखा तथा फोक्सोमा समस्या परिरहेको चिकित्सकको भनाइ छ । केही दिनयता काठमाडौंको वायु प्रदुषण संसारकै नराम्रो सहरमा दरिन पुगेको छ । जथाभावी र अव्यवस्थित वस्ती, हरियाली अभाव, पानी नपर्नु जस्ता वायु प्रदुषणका मुख्य कारण हुन् । पानी नपर्दा काठमाडौंको आकाशमा धुलो थुप्रिएको छ ।

काठमाडौँको समग्र वायु गुणस्तर सूचकाङ्क एक्यूआई बिहीबार ३५२ पुगेको छ । विश्व स्वास्थ्य संगठनको मापदण्डअनुसार मानव स्वास्थ्यको लागि एक्यूआई ३५ भन्दा कम हुनुपर्छ । तर ५० सम्मको एक्यूआईलाई सामान्य नै मानिन्छ । ५१ देखि एक सयसम्मको एक्यूआइलाई होसियारी रहनुपर्ने अवस्था तथा एक सय एकदेखि एक सय ५० सम्मको एक्यूआईलाई श्वासप्रश्वास र मुटु रोगीका बिरामीलाई असर गर्छ भन्ने बुझिन्छ भने एक सय ५१ देखि दुई सयसम्मको एक्यूआइलाई अस्वस्थकर मानिन्छ ।

दुई सय एकदेखि तीन सय सयसम्मको एक्यूआईलाई अति अस्वस्थ अवस्थाको वायू भनेर बुझिन्छ भने तीन सय एकदेखि चार सयसम्मलाई खतरनाक र चारसय एकदेखि चार सय ५० सम्मलाई अति खतरा मानिन्छ । स्वास्थ्य मन्त्रालयले विज्ञप्ति जारी गरी नेपालको वायु विश्वकै अत्यधिक अस्वस्थकर सूचीको माथिल्लो स्थानमा रहेको भन्दै सजगता अपनाउन आग्रह गरेको छ ।