मल्ललाई ‘आइकोनिक इन्टरप्रिनरसिप अवार्ड’
टुरिजमफेस
काठमाडौं । नेपाल चेम्बर अफ कमर्सका निवर्तमान अध्यक्ष तथा प्रभु इन्स्योरेन्सका अध्यक्ष राजेन्द्र मल्ललाई प्रोफेशनल अचिभमेन्ट अवार्ड टिमले प्रदान गर्ने आइकोनिक इन्टरप्रिनरसिप अवार्डबाट सम्मानित गरिएको छ ।
नेपालको औद्योगिक तथा व्यावसायिक क्षेत्रमा गरेको योगदानको उच्च प्रशंसा स्वरुप मल्ललाई उक्त अवार्ड प्रदान गरिएको हो । एक कार्यक्रममा पूर्वप्रधानमन्त्री एवं माओवादी केन्द्रका अध्यक्ष पुष्पकमल दाहालले मल्ललाई प्रमाणपत्र सहित सम्मान गरे ।
चार दशकदेखि निरन्तर उद्योग, वाणिज्य र बीमा क्षेत्रसँग आबद्ध रहेर निजी क्षेत्रको सुदृढीकरणमा महत्वपूर्ण भूमिका निर्वाह गर्दै आएका मल्ल यसअघि नेपाल चेम्बर अफ कमर्सको अध्यक्ष थिए ।
सम्मान ग्रहण गरेपछि मल्लले अवार्डले आफूलाई अझ ठूलो जिम्मेवारी थपिएको महसुस भएको बताए । मल्ल निर्जीवन बीमा व्यवसायी संघको अध्यक्ष समेत हुन् ।
