फेरान टोरेसको अतिरिक्त समयको गोलले स्पेनलाई विश्वकप उपाधि, अर्जेन्टिनाको सपना अधुरै
काठमाडौं । स्पेनले सन् २०२६ को फिफा विश्वकपको उपाधि जित्दै १६ वर्षपछि पुनः विश्व फुटबलको शिखरमा आफूलाई स्थापित गरेको छ। फाइनलमा स्पेनले अर्जेन्टिनालाई अतिरिक्त समयमा १–० ले पराजित गर्दै दोस्रो पटक विश्व च्याम्पियन बन्न सफल भयो।
सन् २०१० मा नेदरल्यान्ड्सविरुद्ध अतिरिक्त समयमा गोल गर्दै पहिलो पटक विश्वकप जितेको स्पेनले यसपटक पनि अतिरिक्त समयमै निर्णायक गोल गर्दै इतिहास दोहोर्याएको हो।
स्पेनको जितका नायक बने वैकल्पिक खेलाडी फेरान टोरेस। उनले खेलको १०६औँ मिनेटमा अर्जेन्टिनाका गोलरक्षक एमिलियानो मार्टिनेजलाई छक्याउँदै गरेको गोल नै उपाधि जिताउन पर्याप्त बन्यो। उनको गोलसँगै लिओनल मेसी नेतृत्वको अर्जेन्टिनाको लगातार दोस्रो विश्वकप जित्ने सपना पनि समाप्त भयो।
३९ वर्षीय मेसीका लागि फाइनल खेल अपेक्षाकृत फिक्का रह्यो। खेलको सुरुआती १५ मिनेटमा उनले केवल ‘किक अफ’ का क्रममा मात्र बल छोएका थिए। अर्जेन्टिनाले पहिलो हाफभरि गोलतर्फ कुनै प्रभावकारी प्रहार गर्न सकेन भने स्पेनले लगातार दबाब सिर्जना गरेको थियो।
खेलको मध्यविराममा मडोना, बीटीएस, जस्टिन बिबर र साकिरालगायत कलाकारहरूको २७ मिनेट लामो सांगीतिक प्रस्तुति गरिएको थियो, जसले फाइनललाई थप आकर्षक बनाएको थियो।
अतिरिक्त समयअघि अर्जेन्टिना थप दबाबमा परेको थियो। मिडफिल्डर एन्जो फर्नान्डेजले स्पेनका युवा डिफेन्डर पाउ कुबार्सीमाथि गरेको फाउलका कारण दोस्रो पहेँलो कार्ड पाएपछि मैदान छाड्नुपरेको थियो। न्युजर्सीस्थित मेटलाइफ स्टेडियममा भएको खेलमा त्यसपछि अर्जेन्टिना १० खेलाडीमा सीमित बन्यो।
संख्यात्मक रूपमा अग्रता पाएपछि स्पेनले अतिरिक्त समयमा खेलमाथि पूर्ण नियन्त्रण जमायो। निकोलस ओटामेन्डीमाथि फाउल भएको भन्दै स्पेनको एक गोल रद्द गरिए पनि टोरेसको निर्णायक गोलले टोलीलाई विश्वकप उपाधि दिलायो।
प्रतियोगिताभरि उत्कृष्ट प्रदर्शन गरेको स्पेनले केवल एक गोल मात्र बेहोरेको थियो। बलियो रक्षापंक्ति, सामूहिक खेल र स्पष्ट रणनीतिका कारण टोलीले बेल्जियम र फ्रान्सजस्ता बलिया प्रतिद्वन्द्वीलाई पराजित गर्दै फाइनलसम्मको यात्रा तय गरेको थियो। पेड्रो पोरोसहितका खेलाडीहरूको योगदान पनि महत्वपूर्ण रह्यो।
अर्कोतर्फ, अर्जेन्टिनाको खेल शैली मेसीमा बढी निर्भर देखियो। स्पेनको सशक्त रणनीतिका कारण मेसीले आफ्नो प्रभाव जमाउन सकेनन्। अतिरिक्त समयमा उनले गरेको एउटा प्रहार पनि स्पेनका डिफेन्डरले रोकिदिएका थिए।
१० वर्षअघि यही मेटलाइफ स्टेडियममा कोपा अमेरिका फाइनलमा पराजित भएपछि सन्यासको घोषणा गरेका मेसीले पुनरागमन गर्दै अर्जेन्टिनालाई एक विश्वकप र दुई कोपा अमेरिकाको उपाधि दिलाएका थिए। यसपटक उनी सुखद बिदाइको आशामा थिए, तर त्यो सपना पूरा हुन सकेन।
एन्जो फर्नान्डेजको रातो कार्ड अर्जेन्टिनाका लागि निकै महँगो सावित भयो। रेफ्रीसँग विवादका कारण पहिलो पहेँलो कार्ड पाएका उनले खेलको अन्त्यतिर गरेको अनावश्यक फाउलका कारण दोस्रो कार्ड पाएर मैदान छाड्नुपरेको थियो।
स्पेनले आफ्नो परिचित आक्रामक र सामूहिक फुटबल प्रदर्शन गर्दै विश्व फुटबलको नयाँ अध्याय लेखेको छ। फेरान टोरेसको निर्णायक गोलसँगै स्पेनले दोस्रो विश्वकप उपाधि उचाल्दा, मेसीको ३९ वर्षको उमेरमा विश्व च्याम्पियन बन्ने अन्तिम सपना भने अधुरै रह्यो। एजेन्सीको सहयाोगमा
