काठमाडौं । दसैँ मनाउन घर जाने यात्रुको चापलाई व्यवस्थित गर्न सरकारले शुक्रबारदेखि सार्वजनिक यातायातको अग्रिम टिकट बुकिङ खुला गरेको छ। चाडपर्वका बेला यात्रुले सहज रूपमा टिकट पाउन र यात्रा व्यवस्थापन प्रभावकारी बनाउन अग्रिम बुकिङको व्यवस्था गरिएको हो।

यातायात व्यवस्था विभागले यातायात व्यवसायी, मजदुर संगठन, ट्राफिक प्रहरीलगायत सरोकारवालासँग छलफल गरेपछि अग्रिम टिकट बिक्री सुरु गरेको जनाएको छ।

दसैँको समयमा यात्रुको चाप बढ्ने भएकाले लामो तथा मध्यम दूरीका सार्वजनिक सवारीसाधनलाई आवश्यकताअनुसार रिजर्भमा सञ्चालन गर्नसमेत व्यवस्था मिलाइएको छ। फूलपातीदेखि पूर्णिमासम्मका लागि रुट परमिट खुला गरिएको छ।

चाडपर्वको अवधिमा अत्यावश्यक वस्तुको आपूर्ति प्रभावित हुन नदिन फलफूल, तरकारी, औषधि, खसीबोका तथा खाद्यान्न ढुवानी गर्ने सवारीसाधनलाई प्राथमिकता दिइने विभागले जनाएको छ। अन्य सामग्रीको ढुवानी भने आवश्यकताअनुसार व्यवस्थापन गरिनेछ।

यात्रुको सहजताका लागि सहायता कक्ष

टिकट खरिद, भाडादर र यात्राका क्रममा हुन सक्ने समस्यालाई सम्बोधन गर्न विभिन्न स्थानमा यात्रु सहायता कक्ष स्थापना गरिएका छन्। हाल १५ स्थानमा यस्ता कक्ष सञ्चालनमा रहेको जनाइएको छ।

काठमाडौंका बसपार्क, कोटेश्वर र बल्खुलगायत प्रमुख स्थानमा यातायात व्यवस्था विभाग, यातायात व्यवसायी, मजदुर संगठन र ट्राफिक प्रहरी सम्मिलित टोलीसमेत परिचालन गरिएको छ।

यात्रुले तोकिएकोभन्दा बढी भाडा लिएको, टिकटमा कालोबजारी भएको वा अन्य समस्या भोग्नुपरेमा सहायता कक्षमा उजुरी गर्न सक्नेछन्। त्यस्तै, ट्राफिक प्रहरीको १०० नम्बरमा सम्पर्क गरेर पनि जानकारी दिन सकिने व्यवस्था गरिएको छ।

विभागले यातायात व्यवसायीलाई निर्धारित भाडादरमा मात्र टिकट बिक्री गर्न निर्देशन दिएको छ। टिकट बिक्रीमा हुने अनियमितता तथा बिचौलियामार्फत हुने कालोबजारी नियन्त्रण गर्न पनि निगरानी बढाइने जनाइएको छ।

अग्रिम टिकट बुकिङ सुरु भएसँगै काठमाडौंका प्रमुख बसपार्कमा यात्रुको चहलपहल बढेको छ। दसैँ नजिकिँदै गर्दा घर फर्किने यात्रुको सङ्ख्या थप बढ्ने अनुमान गरिएको छ। त्यसैले टिकट वितरण, सवारी व्यवस्थापन र यात्रुको सुरक्षालाई प्रभावकारी बनाउन सम्बन्धित निकायले तयारी अघि बढाएका छन्।