साउन ७ गते प्रधानमन्त्रीले सांसदहरूसँग प्रश्नोत्तर गर्ने
३ साउन, काठमाडौं । प्रधानमन्त्री केपी शर्मा ओलीले साउन ७ गते प्रतिनिधिसभाका सांसदहरुसँग प्रश्नोत्तर गर्ने भएका छन् । त्यसअघि साउन ६ गते प्रधानमन्त्री ओलीले विश्वासको मत लिने कार्यसूचि तय भएको छ ।
सभामुख देवराज घिमिरेले मुख्य र प्रमुख सचेतकहरूसँग यहि विषयमा छलफल गरेका छन् । छलफलमा प्रतिनिधि सभाको साउन ६ गतेको बैठकमा प्रधानमन्त्री केपी शर्मा ओलीले विश्वासको मत प्रस्ताव पेस गर्न समय मागेकोले त्यसलाई कसरी व्यवस्थित गर्नेलगायत कुराकानी भएको छ ।
त्यसैक्रममा प्रधानमन्त्री ओलीले साउन ६ गते विश्वास मत लिने र साउन ७ गते प्रतिनिधि सभामा सांसदहरूसँग प्रत्यक्ष प्रश्नोत्तर गर्ने कार्यक्रम पनि तय भएको हो ।
साउन ६, ७, ८, १३, १४ र १५ गते प्रतिनिधि सभा बैठक बस्ने छ । बिदा बाहेकका यो अवधिका अन्य दिनमा विभिन्न समितिहरुको बैठक बस्नेछ । समितिमा विचाराधीन विधेयकहरुका वारेमा छलफल हुने छ।
