पर्यटन क्षेत्रको विकासका लागि नीतिगत सुधार गर्न मन्त्रालय तयार छः मन्त्री पाण्डे

टुरिजमफेस
काठमाडौं ।
संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेले पर्यटन क्षेत्रको विकासको लागि आवश्यक नीतिगत सुधारको लागि मन्त्रालय तयार रहेको बताएका छन् ।

पर्यटन क्षेत्रमा भइरहेको कामको जानकारी लिने क्रममा बुधवार पर्यटन बोर्डमा पुगेका मन्त्री पाण्डेले पर्यटन क्षेत्रलाई चलायमान बनाउन पनि निर्देशन दिए । नेपालमा पर्यटनको अथाह सम्भावना रहेको उल्लेख गर्दै यसको सदुपयोग गर्नसक्नु पर्ने आजको आवश्यकता रहेको उनको भनाइ छ । पर्यटन विकासका लागि सरकारको एकल प्रयास पर्याप्त नभएकोले नै सार्वजनिक निजी साझेदारीको अवधारणा अनुरुप बोर्ड गठन गरिएको उल्लेख गर्दै उनले पर्यटन क्षेत्रलाई थप चलायमान बनाउन अल्पकालीन, मध्यकालीन तथा दीर्घकालीन रणनीति आवश्यक रहेको बताए । ‘बोर्डसँग नीतिगत, कार्यगत तथा, प्रवृतिगत सुधार एवं कर्मचारीको वृत्तिविकास लगायत थु्प्रै विषय जोडिएका छन् । यसलाई समाधान गर्दै लैजानु पर्छ । अनेक समस्या हुँदाहुँदै पनि पर्यटनमा धेरै सम्भावना छन् व्यक्ति भन्दा पनि देशका लागि हामीले के ग¥यौं भन्ने भावनाले काम गर्न सकेमा पर्यटनबाट धेरै लाभ लिन सकिन्छ,’ उनले भने ।
त्यसक्रममा पर्यटन मन्त्रालयका सचिव तथा बोर्डका अध्यक्ष डा. गणेशप्रसाद पाण्डे, बोर्डका उपाध्यक्ष कमल सापकोटा, सदस्य सचिव मिलन देवकोटा, सदस्यहरू मदन आचार्य, ऋषि भण्डारी र राजेन्द्र लामा तथा बोर्डका निमित्त कार्यकारी प्रमुख हिक्मत सिंह ऐरले मन्त्री पाण्डेलाई बोर्डमा स्वागत गरेका थिए । बोर्डका निमित्त कार्यकारी प्रमुख ऐरले नेपालको पर्यटन विकासको लागि गठित बोर्डको अवधारणा, विभिन्न गतिविधि तथा भावी कार्यक्रमबारे जानकारी दिएका थिए । ‘कतिपय नीतिगत समस्याको कारण बोर्डले विदेशमा आयोजना गरिने कार्यक्रम गर्न नसकिरहेको जानकारी दिँदै ऐरले नीतिगत तथा प्रकृयागत सहजीकरण हुनासाथ विदेशमा गरिने कार्यक्रमलाई थप प्रभावकारी बनाउन सकिने बताए ।