माछापालन आम्दानीको स्रोत मात्र नभई एग्रो टुरिजम पनि

वार्षिक दुई सय टनभन्दा बढी माछा उत्पादन हुन्छ

टुरिजमफेस
भरतपुर (चितवन) । चितवनको खैरहनी नगरपालिका–१२ चिसाहानीका हरि अर्यालले १३ वर्षअघि माछापालन सुरू गरे । साथीभाइले माछापालन गरेको देखेर उनले पाँच कठ्ठा जमिनमा पोखरी खनेर माछापालन सुरू गरेका हुन् ।

सुरूआती कठिनाइका बाबजुद, अर्यालले माछापालनलाई व्यावसायिक रूपमा विस्तार गरे । पछि राम्रो हुँदै गएपछि उनले २०७३ सालमा चार बिघा जमिन थपेर ६ प्रजातिका माछापालन गर्न थाले । अहिले, चार बिघा जमिनको जलासयमा माछा छन् । उनले वार्षिक एक करोड ५० लाखको माछा बिक्री गर्छन् ।

खर्च कटाएर वार्षिक ७० लाखभन्दा बढी नाफा हुने अर्याल बताउँछन् । ‘वार्षिक ६० लाख रूपैयाँ जति दाना र विद्युत् लगायतका अन्य क्षेत्रमा खर्च हुन्छ,’ उनले भने, ’वार्षिक ७० लाख त कम्तिमा बचत हुन्छ ।’

उनको फर्ममा वार्षिक दुई सय टनभन्दा बढी माछा उत्पादन हुन्छ । यतिखेर १० टन माछा बजार लैजाने तयारी छ । अर्यालले माछापालनमा आधुनिक प्रविधिको प्रयोग गर्दै उत्पादन र बिक्रीमा ध्यान दिएका छन् ।

उनले उत्पादन गरेका माछा चितवनसहित काठमाडौँ, पोखरा, बुटवललगायत सहरमा बिक्रीका लागि लैजाने गरिन्छ । माछापालनले अर्यालको जीवनस्तरमा महत्वपूर्ण सुधार ल्याएको छ । उनले आफ्नो आम्दानीबाट थप जमिन किनेर घर बनाएका छन् । केही समयमै गाडी किन्ने योजना रहेको पनि उनले बताए ।

माछापालन व्यवसायबाट नै अर्यालले तीन छोराछोरीलाई चितवनको प्रतिष्ठित बोर्डिङ स्कुलमा पढाइरहेका छन् । उनले आफ्नो फर्ममा ६ जनालाई रोजगारी दिएका छन् । आगामी दिनमा माछापालन व्यवसायलाई एग्रो टुरिजममा विस्तार गर्ने योजना रहेको उनी बताउँछन् ।

‘पोल्ट्री क्षेत्रमा हात हालेको छु । त्यसबाट राम्रो आम्दानी हुन सकेन,’ अर्यालले भने, ‘यतिबेला कागती खेतीमा पनि लगानी गरेको छु, यसलाई एग्रो टुरिजममा लैजाने योजना छ ।’

श्रीमान–श्रीमती नै माछापालनमा खटिन्छन् । उनले माछापालनमा रूची राख्ने अन्य कृषकलाई प्रशिक्षण र सल्लाह प्रदान गर्दै आएका छन् । ४५ वर्षीय अर्याल सन् २००५ मा मलेसिया पुगेका २४ महिना त्यहाँ बसे । त्यतिखेर नेपालमै केही गर्ने सोचका साथ राम्रै पैसा कमाएर स्वदेश फर्किएका अर्याल यहाँ भनेजस्तो नभएपछि फेरि सन् २००८ मा युनाइटेड अरब इमिरेट्स (युएई) को दुबई गएका थिए ।

दुई वर्ष दुबई बसेर फर्किएका अर्याल परम्परागत खेतीपाती मै लागेका थिए । पछि भरतपुरको बजार क्षेत्रमा माछापालन गरेको देखे । यसबाट फाइदा हुने पाएपछि माछापालन गर्न थाले । माछापालन गर्दा सुरूवाती दिनमा धेरै दुःख पाएको उनको अनुभव छ ।

‘एक कठ्ठामा माछा कति राख्ने, कसरी राख्ने केही ज्ञान थिएन, अन्धाधुन्ध नै माछापालन गर्न थालियो,’ उनले भने, ‘सुरूमा व्यापारीले ठगे । दुई तीन वर्ष घाटा नै भयो ।’

पछि माछापालनसम्बन्धी बुझ्दै गएपछि सहज भएको उनको भनाइ छ । सुरुका दिनमा अर्यालले बङ्गलादेशबाट माछाका भुरा ल्याएर माछापालन गर्न थालेका थिए ।

त्यतिखेर भारतीय बाटो हुँदै लुकाइछिपाइ गरेर भुरा ल्याउनुपर्ने बाध्यता रहेको उनले सुनाए। अहिले भने चितवनमै सरकारीस्तरबाट माछाका भुरा उत्पादन हुँदा माछापालन गर्न सहज भएको उनले बताए । अर्याल पछिल्लो समयमा अधिकांश किसानका लागि प्रेणाका स्रोत बनिरहेका छन् ।

माछापोखरीमा आर्यालले दुई करोड लगानी गरेका छन् । सात पोखरीमा माछा छन् । सुरूमा पोखरी खन्दा नै एक करोड खर्च लागेको उनले बताए । जग्गा भाडामा लिएर माछापालन गरे अर्यालको २८ कठ्ठा जमिन आफ्नै हो ।

अहिले चितवनमा पन्ध्र सयभन्दा बढी किसान माछापालनमा लागेका छन् । नेपालमा माछापालनमा राम्रो सम्भावना रहेको उनको भनाइ छ ।

‘विदेश जानुभन्दा, यहाँ नै उत्पादनमूलक काम गरेर राम्रो आम्दानी गर्न सकिन्छ,’ उनले भने । राज्यले दाना र बिजुलीमा छुट दिएमा नेपाली माछापालन किसान अगाडि बढ्न सक्ने उनले बताए ।

‘माछापालनमा राम्रो आम्दानी छ तर राज्यले हेर्ने नजर गलत छ,’ अर्यालले भने, ‘देश धनी बनाउने हो भने विदेश जाने युवालाई रोकेर कृषिमा लगानी गर्न जरूरी छ ।’ उनले भारतबाट अवैध रूपमा माछाको आयात नरोकिँदा नेपाली किसान मारमा पर्दै आएको गुनासो गरे ।

‘भारतका माछालाई व्यवस्थापन गर्न सके नेपालमा उत्पादन भएका माछाले सहजै बजार पाउँछन्,’ उनले भने, ‘राज्यले ठोस योजना बनाएर अवैध कारोबार रोक्नुपर्छ ।’

माछा व्यवसायी संघ चितवनका उपाध्यक्षसमेत रहेका अर्यालले संघकै नेतृत्वमा अवैध माछा नियन्त्रण गरेर नष्ट गर्ने अभियान चलाए पनि सार्थकता पाउन नसकेको बताए ।

वार्षिक दुई सय टनभन्दा बढी माछा उत्पादन हुन्छ