पर्यटन व्यवसायीका लागि सुनौलो अवसर बन्यो उखरमाउलो गर्मी, त्रिशुलीमा खचाखच पर्यटक
टुरिजमफेस
काठमाडौं । मनसुन सक्रिय नहुँदा अत्याधिक गर्मी बढेपछि त्रिशुलीमा र्याफ्टिङ गर्नेको संख्या बढेको छ ।
देशका विभिन्न ठाउँबाट बढ्दो गर्मी छल्नकै लागि मानिसहरु त्रिशूली नदीमा र्याफ्टिङ गर्न आउँदा त्याहाँको पर्यटन व्यवसाय फस्टाएको व्यवसायीले बताएका छन् ।
काठमाडौँ तथा चितवनबाट गाडीमा दुई/तीन घण्टामै त्रिशुली दनदीमा पुग्न सकिने भएपछि दिनानुदिन नदीमा र्याफ्टिङ गर्नेको सङ्ख्या बढेको हो । र्याफ्टिङ मात्रै होइन यतिबेला त्रिशूलीमा ‘क्लिफ जम्प’ गर्दै नदीको चिसो पानीमा रमाउनेहरु पनि उत्तिकै रहेको पर्यटन व्यवसायीले बताए ।
त्यसो त यो र्याफ्टिङका लागि सबैभन्दा उपयुक्त समय पनि यहि हो । लामो समयदेखि र्याफ्टिङ व्यवसाय सञ्चालन गर्दै आएका त्रिशूली रिभर साइड रिसोर्ट र त्रिशूली भिल्लाका सञ्चालक उद्धव कँडेल यतिबेला र्याफ्टिङका लागि आउनेहरुको सङ्ख्या उल्लेख्य बढेको बताउछन् ।
“र्याफ्टिङका लागि यो अनुकूल समय हो, वर्खा सुरु नभएकाले नदीमा पानीको सतह पनि बढेको छैन”, उनले भने, “पारिवारिक साहसिक गतिविधि भएकाले र्याफ्टिङ गर्नेहरु बढेका छन् ।” बिदाका दिन आउने, र्याफ्टिङ गर्ने र रिसोर्ट तथा भिल्लामा एक रात बिताउनेहरु बढेको उनको भनाइ छ ।
उनका अनुसार त्रिशूलीमा खासगरी काठमाडौँ, चितवन, पोखरालगायतका सहरबाट मानिसहरु आउने गरेका छन् । “कतिपय मानिसहरु काठमाडौँ–चितवन–पोखराको यात्राका क्रममा पनि र्याफ्टिङ गरेर जानेहरु हुनुहुन्छ, त्यसबाहेक काठमाडौँ र चितवनबाट प्याकेजमा र्याफ्टिङलगायतका गतिविधिका लागि आउनेहरु हुनुहुन्छ”, उनले भने । यहाँ आउनेहरु गर्मी छल्ने मात्रै नभइ नदीमाथि स्काइ साइकलिङलगायतका गतिविधिका लागि पनि आउने गरेको उनको बुझाइ छ ।
त्रिशूली नदीमा र्याफ्टिङ निकै सहज भएकाले काठमाडौँबाट चितवन वा पोखरा जाने जोकोहीले पनि बाटोमा र्याफ्टिङ गर्न सक्छन् । “र्याफ्टिङ सबै उमेर समूहका लागि हो”, सञ्चालक कँडेलले भने ।
र्याफ्टिङ गाइड मिथुन श्रेष्ठका अनुसार त्रिशूली नदी आफैँमा र्याफ्टिङका लागि प्रमुख गन्तव्य हो । परिवार तथा साथीहरुको समूहमा नदीमा र्याफ्टिङ गर्दा र्यापिड (पानीको भङ्गालो) मा पैंठेजोरी खेल्दै जानुको अनुभव निकै रोमाञ्चक हुने उनको अनुभव छ । काठमाडौँबाट नजिकैको गन्तव्य र सहज यातायातको पहुँचका कारणले त्रिशूली र्याफ्टिङको प्रमुख गन्तव्य बनेको छ । राससको सहयोगमा
