हिमपातले डोल्पाको पर्यटन प्रभावित, फोक्सुण्डो जाने क्रममा ६ भारतीय पर्यटक बेपत्ता

 सुर्खेत। अत्यधिक हिमपातका कारण डोल्पाको उच्च हिमाली क्षेत्रमा पर्यटकीय गतिविधि प्रभावित भएको छ। शे–फोक्सुण्डो ताल भ्रमणका लागि गएका ६ जना भारतीय पर्यटक हिमपातपछि सम्पर्कविहीन भएका छन्। बेपत्ता हुनेमा दुई महिला र चार पुरुष रहेका छन्। उनीहरूको खोजी तथा उद्धारका लागि हेलिकप्टरको व्यवस्था गर्न सम्बन्धित निकायसँग आग्रह गरिएको छ।

डोल्पाको डोल्पो बुद्ध गाउँपालिकाबाट शे–फोक्सुण्डो तालतर्फ फर्किने क्रममा शे–फोक्सुण्डो गाउँपालिका–४ र ८ को बीचमा पर्ने नुमला पास र वागला पास क्षेत्रमा उनीहरू सम्पर्कविहीन भएका हुन्। बंगालको खाडीमा विकसित अर्नब चक्रवातको प्रभावले उच्च हिमाली क्षेत्रमा भारी हिमपात भएपछि पर्यटकहरू हिउँमा फसेको हुन सक्ने स्थानीय गाइडहरूको अनुमान छ।

स्थानीयवासीले हिमपातका कारण उच्च हिमाली भञ्ज्याङ पार गर्न जोखिम हुने भन्दै सावधानी अपनाउन आग्रह गरे पनि पर्यटकहरू त्यसतर्फ गएको बताइएको छ। प्रमुख जिल्ला अधिकारी जुनु हमालका अनुसार उनीहरू धो क्षेत्रबाट फोक्सुण्डो तालतर्फ फर्किने क्रममा बेपत्ता भएका हुन्।

शे–फोक्सुण्डो गाउँपालिकाका अध्यक्ष धावा सम्दुक गुरुङले नुमला र वागला पास क्षेत्रमा मोबाइल नेटवर्क नहुँदा पर्यटकहरूको अवस्थाबारे जानकारी लिन कठिन भएको बताए। प्रतिकूल मौसम र बाक्लो हिमपातका कारण खोजी तथा उद्धार कार्यमा समेत चुनौती थपिएको छ।

उपल्लो डोल्पामा २४४ पर्यटक

जिल्ला प्रशासन कार्यालयको तथ्यांकअनुसार हाल उपल्लो डोल्पामा २४४ जना पर्यटक पुगेका छन्। तीमध्ये १४९ जना नेपाली, ४४ जना सार्क राष्ट्रका र ५१ जना अन्य विदेशी नागरिक छन्।

शे–फोक्सुण्डो ताल पछिल्लो समय आन्तरिक तथा विदेशी पर्यटकको आकर्षक गन्तव्यका रूपमा स्थापित हुँदै गएको छ। प्राकृतिक सौन्दर्य, नीलो ताल, हिमाली भू-दृश्य र विशिष्ट सांस्कृतिक सम्पदाका कारण यस क्षेत्रमा पर्यटकको आकर्षण बढिरहेको छ।

गत आर्थिक वर्ष २०८२/८३ को ११ महिनामा मात्रै ४ हजार ८८२ जना पर्यटकले फोक्सुण्डो तालको भ्रमण गरेका थिए। तर, मौसमको प्रतिकूलता र उच्च हिमाली पदमार्गमा देखिने जोखिमले यस क्षेत्रको पर्यटन व्यवस्थापनमा चुनौती सिर्जना गरेको छ।

उद्धारका लागि हेलिकप्टरको माग

जिल्ला प्रहरी कार्यालयका प्रहरी नायब उपरीक्षक अनिलराज गिरीले ६ जना भारतीय पर्यटक अझै सम्पर्कमा नआएको जानकारी दिएका छन्। उनीहरूको खोजी तथा उद्धारका लागि हेलिकप्टर उपलब्ध गराउन सम्बन्धित निकायसँग अनुरोध गरिएको उनले बताए।

प्रमुख जिल्ला अधिकारी हमालका अनुसार बेपत्ता पर्यटकको खोजीका लागि नेपाली सेनाको टोलीसमेत परिचालन गरिएको छ। अत्यधिक हिमपात, खराब मौसम र सञ्चार सम्पर्कविहीन क्षेत्रका कारण उद्धारमा कठिनाइ भइरहेको छ।

यस घटनाले डोल्पाको उच्च हिमाली पर्यटनमा मौसम पूर्वानुमान, सुरक्षित पदयात्रा, अनुभवी गाइडको व्यवस्था, सञ्चार सुविधा र आपत्कालीन उद्धार प्रणालीको आवश्यकता पुनः उजागर गरेको छ। विशेषगरी नुमला र वागला पासजस्ता उच्च जोखिमयुक्त पदमार्गमा यात्रा गर्नुअघि मौसमको अवस्था बुझ्ने, स्थानीय प्रशासनको सुझाव पालना गर्ने र आवश्यक सुरक्षा तयारीसहित मात्र यात्रा गर्नुपर्ने देखिएको छ।

शे–फोक्सुण्डो क्षेत्रको पर्यटनलाई सुरक्षित र दिगो बनाउन पर्यटकको आवागमन व्यवस्थापन, पदमार्गको नियमित अनुगमन तथा आपत्कालीन उद्धार संयन्त्रलाई थप प्रभावकारी बनाउनु आवश्यक देखिन्छ।