जनार्दनले पार्टी विभाजन गर्ने कुरा निराधारः माओवादी केन्द्र
टुरिजमफेस
काठमाडौं । नेकपा (माओवादी केन्द्र) ले पार्टीका उपमहासचिव जनार्दन शर्माले पार्टी विभाजन गर्ने भन्ने हल्ला निराधार रहेको स्पष्ट पारेको छ । माओवादी केन्द्रले एक सर्कुलर जारी गर्दै शर्माले पार्टी फुटाउन नलागेकाले कार्यकर्तालाई सोही अनुसार बुझ्न भनेको छ । सो पार्टीले यसअघि भदौ २ गते पनि पार्टी विभाजन गर्ने हल्लामा सत्यता नभएको जनाएको थियो । ‘पछिल्लो समयमा कतिपय सन्दर्भमा हाम्रो पार्टी विभाजन हुँदै छ भनी जसरी चर्चा, परिचर्चा चलिरहेको र त्यसमा पनि उपमहासचिव जनार्दन शर्मा ‘प्रभाकर’ ले पार्टी फुटाउँदै छ भन्ने प्रचारमा कुनै सत्यता छैन र हाम्रो पार्टी एकताबद्ध रहेको र रहिरहने विश्वास गर्दछ,’ पार्टी अध्यक्ष पुष्पकमल दाहाल ‘प्रचण्ड’ र महासचिव देव गुरूङले हस्ताक्षर गरेको परिपत्रमा भनिएको छ । गत स्थायी कमिटी बैठकमा शर्माले पुरक प्रस्ताव पेश गर्दै अध्यक्ष दाहाललाई नेतृत्व छाड्न सुझाव दिएका दिए । त्यसपछि दाहाल निकटहरूले शर्माविरुद्ध पार्टी विभाजन गर्न लागेकोलगायतका आरोप लगाएका थिए ।
