रेसुङ्गा विमानस्थलको उडान २ महिनादेखि बन्द
टुरिजमफेस
गुल्मी । रेसुङ्गा विमानस्थलको उडान दुई महिनादेखि बन्द भएको छ । रेसुङ्गा विमानस्थलका स्टेशन प्रमुख सुमन थापाले नेपाल एयरलायन्सको विमान मर्मत भइरहेको र अन्य विमानको नभएकाले नियमित उडान हुन नसकेको बताए ।
पछिल्लोपटक पुस ४ गते विमानस्थलबाट उडान भएको थियो । यात्रुको अत्याधिक चाप बढेपछि रेसुङ्गा विमानस्थलबाट साप्ताहिक तीन उडानको अनुमति पाएको थियो । हवाई यात्रामा गुल्मी जोडिएसँगै पछिल्लो समय जिल्लाका पर्यटकीय स्थलमा अन्तर्राष्ट्रिय पर्यटक भित्रिन थालेका थिए ।
गुल्मीको ऐतिहासिक, धार्मिक तथा पर्यटकीय स्थल रेसुङ्ग, धुर्कोटको विचित्र गुफा, चन्द्रकोटको टिमुरे ताल र रुरुक्षेत्र घुम्न जान थालेका हुन् । लामो समय उडान बन्द हुँदा विमानस्थलको औचित्यमाथि प्रश्न उठेको रेसुङ्गा नगरपालिका–१ का स्थानीय व्यवसायी गोपाल पन्थीले बताए । विमानस्थलबाट उडान हुन थालेपछि गुल्मीका धेरैजसो वृद्ध, बिरामी, सुत्केरीलगायतका नागरिकले सेवा लिने गरेका थिए ।
