झलनाथ खनाललगायतको दबावले नागरिक उड्डयन प्राधिकरण र नेपाल वायुसेवा निगममा जुनियर नियुक्त गरेँः पूर्व पर्यटन मन्त्री
टुरिजमफेस
काठमाडौं । पूर्व संस्कृति, पर्यटन तथा नागरिक उड्डयन मन्त्री तथा एकीकृत समाजवादीका सांसद प्रेम आलेले पार्टीका सम्मानित नेता झलनाथ खनाललगायतको दबाबमा नेपाल नागरिक उड्डयन प्राधिकरण र नेपाल वायुसेवा निगममा जुनियर कर्मचारीलाई मुख्य जिम्मेवारी दिनु परेको खुलासा गरेका छन् । उनी पर्यटन मन्त्री हुँदा प्राधिकरणको महानिर्देशकमा प्रदीप अधिकारी र निगमको कार्यकारी अध्यक्षमा युवराज अधिकारीलाई नियुक्त गरिएको थियो ।
प्रतिनिधि सभाअन्तर्गतको सार्वजनिक लेखा समितिमा बोल्दै आलेले आफू जुनियरलाई नियुक्त गर्न नहुने पक्षमा हुँदाहुँदै वरिष्ठलाई पन्छाउनु परेको सार्वजनिक गरे । ‘यो यो मानिसहरूलाई नियुक्ति गर्नु भनेरै पार्टीले चिठी पठाएको थियो,’ उनले भने, ‘पार्टीका सम्मानित नेता झलनाथ खनाल र अन्य नेताको सिफारिसमा यी दुई अधिकारी नियुक्त गर्न बाध्य भएँ ।’
‘वरिष्ठताको आधारमा प्राधिकरणमा १२ औं तहका पाँच जना थिए । प्रदीप अधिकारी ११ औं तहका हुनुहुन्थ्यो । तैपनि उहाँलाई नै नियुक्त गर्नैप¥यो,’ उनले भने । उनले मन्त्रीले आफ्नो इच्छाले काम गर्न नपाउने अवस्था रहेको समेत बताए । निगमका कार्यकारी अध्यक्ष युवराज अधिकारीको नियुक्तिमा पनि आफ्नो चाहना नहुँदा नहुँदै र काविल व्यक्तिको खोजी गर्दा पार्टीको निर्देशनमा नियुक्ति दिनु परेको उनले सुनाए ।
