बन्द भएको साढे ३ महिनापछि सुरु भयो रेसुङ्गा विमानस्थलमा उडान, अब नियमित होला ?

टुरिजमफेस
गुल्मी । बन्द भएको साढे तीन महिनापछि पुनः रेसुङ्गा विमानस्थलबाट उडान सुरु भएको छ । गत पुस ४ गतेदेखि उडान हुन नसकेको विमानस्थलबाट उडान सुरु गरिएको स्टेशन प्रमुख सुमन थापाले जानकारी दिए । सोमबार काठमाडौंबाट रेसुङ्गामा १४ जना र रेसुङ्गाबाट काठमाडौंका लागि ४ जना यात्रु लिएर जहाज उडेको थापाले बताए ।

साढे तीन महिनापछिको उडान नेपाल एयरलायन्सले गरेको हो । यसअघि पनि सोही एअरलाइन्सले उडान गर्ने गथ्र्यो । विमान मर्मतका कारण साढे तीन महिनासम्म उडान हुन नसकेको थापाले बताए । यात्रुहरूको चापलाई मध्यनजर गर्दै हरेक साता शुक्रबार र बुधबार उडान गर्ने कार्यतालिका राखिएको उनले बताए ।

गुल्मीबाट काठमाडौंका लागि ७ हजार ३०० र काठमाडौंबाट गुल्मीका लागि ७ हजार ५०० रूपैयाँ भाडा निर्धारण गरिएको छ । हवाई यात्रामा गुल्मी जोडिएसँगै पछिल्लो समय जिल्लाका पर्यटकीय स्थलमा पर्यटक भित्रिन थालेका छन् । गुल्मीको ऐतिहासिक, धार्मिक तथा पर्यटकीय स्थल रेसुङ्गा, धुर्कोटको बिचित्र गुफा, चन्द्रकोटको टिमुरे ताल र रुरुक्षेत्र घुम्न जान थालेका हुन् । स्थानीयहरूले अहिले सुरु भएको हवाई उडान नियमित हुनुपर्ने र अन्य हवाई कम्पनीले पनि उडान सुरु गर्नुपर्ने माग गरेका छन् ।