तीनकुने घटनाको छानबिन गर्न आयोग गठन हुँदैनः गृहमन्त्री

टुरिजमफेस
काठमाडौं । तीनकुने घटनाको बारेमा निष्पक्ष छानबिनका लागि आयोग गठन गर्नुपर्ने आवाज उठिरहेको बेला गृहमन्त्री रमेश लेखकले न्यायिक छानबिन आयोग गठन हुन नसक्ने बताएका छन् । प्रतिनिधि सभाको राज्य व्यवस्था एवं सुशासन समितिमा बोल्दै लेखकले तीनकुने घटना आपराधिक भएको दाबी गर्दै राजनीतिक ढंगले सोचेर न्यायिक आयोग गठनको बाटोमा गए गलत ठाउँमा पुग्ने बताए ।

‘यो गर्नुको उद्देश्य, दुरासय र दुरूत्साहन हो भन्ने थाहा नभएको भए हुन्थ्यो,’ उनले भने, ‘प्रारम्भदेखि नै घटना कसरी भयो ? उक्साहट कसरी भयो ? कुन घर जलाइयो ? कसरी मान्छेलाई जलाएर मारियो ? कुन कुन पार्टी कार्यालायमा ढुङ्गा हानियो ? सबै थाहा छ । त्यसमा को को संलग्न थिए भन्ने पनि थाहा छ । त्यसैले यो नितान्त आपराधिक घटना हो । यसलाई राजनीतिक घटनाका रूपमा हेर्न सकिँदैन ।’

सांसदहरूले उक्त घटनाको न्यायिक छानबिन गर्न आयोग गठनको माग गरेका थिए । नेकपा माओवादी केन्द्रकी सांसद दुर्गा राईले सर्वोच्च अदालतका पूर्वन्यायाधीशको नेतृत्वमा छानबिन समिति गठनको माग गरिन् । त्यस्तै नेपाली कांग्रेसका सांसद हृदयराम थानीले पनि घटनाको निष्पक्ष छानबिन समिति माग गरे । राष्ट्रिय प्रजातन्त्र पार्टीका बुद्धिमान तामाङले सविन महर्जन फर्कंदा गोली हानिएको भनिएको भिडिओ आइरहेको उल्लेख गर्दै पूर्वन्यायाधीशकै संयोजकत्वमा मानव अधिकारकर्मी सहितको छानबिन समिति गठन हुनुपर्ने माग गरे ।