भारतीय पर्यटकले पाँच हजार डलर बराबरको भारतीय रूपैयाँ ल्याउन कत्तिको सहज ?

टुरिजमफेस
काठमाडौं । के अब नेपालमा भारतीय पर्यटकलाई सहज हुँदैछ ? उनीहरू मनलाग्दी पाराले रकम खर्च गर्दैछन् ? यतिखेर यस्ता प्रश्न चौतर्फी सुनिन्छन् । चासो बढ्नु स्वभाविक हो किनकि नेपाल राष्ट्र बैंकले भारतीय नागरिकलाई नेपाल भ्रमणमा पाँच हजार डलर बराबरको भारतीय रूपैयाँ लिएर आउन पाउने व्यवस्था गरेको छ ।

साउनअघि २५ हजार भारतीय रूपैयाँ मात्र भारतीय नागरिकले बोक्न पाउँथे । अहिले पहिलेको तुलनामा दोब्बरले सुविधा बढेपछि नेपालमा भारतीय पर्यटक बढ्ने र त्यसले नेपालको पर्यटन क्षेत्रमा सुधार हुने अपेक्षा गरिएको छ । नेपालगन्जका पर्यटन व्यवसायी लक्ष्मण अर्याल राष्ट्र बैंकको निर्णयले केही आशा बढेको बताउँछन् । उनी ५ हजार अमेरिकी डलरको सीमा अझै कम भएको बताउँछन् । नेपालका नीति पर्यटक मैत्री हुने र भारतीय पर्यटकलाई सम्मान गर्ने हो भने भारतबाट नेपालमा ठूलो संख्यामा पर्यटक आउने उनको दावी छ ।

हवाई वा स्थलमार्गबाट नेपाल प्रवेश गर्ने भारतीय यात्रुले नेपालमा विनिमय हुने पाँच हजार अमेरिकी डलरबराबरको विदेशी मुद्रा वा ट्राभलर्स चेक ल्याउन पाउने व्यवस्थाले सीमा क्षेत्रको पर्यटकीय गतिविधिमा सुधार हुने उनको अनुमान छ । यद्यपि नयाँ नियमबारे भारतीय पर्यटकलाई जानकारी दिनु पनि उत्तिकै आवश्यक रहेको उनको भनाइ छ । सरकारले बजेटमा घोषणा गरेपछि राष्ट्र बैंकले १० भदौमा सार्वजनिक सूचना जारी गरी नेपाली वा विदेशी नागरिकले नगद विदेशी मुद्रा अमेरिकी पाँच हजार डलरसम्म ल्याउने प्रावधान रहेको जनाएको छ ।

नेपालमा सडक मार्ग हुँदै कति पर्यटक आउँछन् भन्नेबारे यकिन विवरण पाइँदैन । सबैले अनुमान मात्र लगाउँदै आएका छन् । हवाई मार्गबाट भने गत वर्ष करिब ११ लाख पर्यटक नेपाल आएका थिए । जसमा भारतीय पर्यटकको संख्या ठूलो छ । हवाई मार्गको साथै कैयन भारतीय पर्यटक स्थलमार्गबाट पनि नेपाल घुम्न आउने गर्छन् । त्यस्तै सीमावर्ती सहरमा क्यासिनोका लागि पनि भारतीय पर्यटक आउने गरेको पाइन्छ ।

यद्यपि नेपाल आउने भारतीय पर्यटकलाई सीमा नाकामा प्रशासनिक निकायले अनेक झन्झट सृजना गर्ने गरिएको गुनासो पनि व्याप्त छ । विहेका लागि नेपाल आउने भारतीय पर्यटकलाई सीमामा अनेक झन्झट दिने गरिँदा पछिल्लो समय विहेका लागि भारतीय नेपाल आउन कम भएको व्यवसायी बताउँछन् । अहिले सरकारले ल्याएको नियम पनि सहज रूपमा कार्यान्वयन हुनु पर्ने पर्यटकलाई समस्या सृजना गरिए कारवाही हुने व्यवस्था मिलाउनु पर्ने व्यवसायीको भनाइ छ ।