चिनियाँ बजारको पुनरागमनले पर्यटनमा उत्साह, जुलाईमा विदेशी आगमन बढ्यो

काठमाडौं । सन् २०२६ को जुलाई महिनामा नेपालले ७१ हजार ७७५ विदेशी पर्यटकलाई स्वागत गरेको छ। नेपाल पर्यटन बोर्डको पछिल्लो तथ्यांकअनुसार यो संख्या गत वर्षको सोही अवधिको तुलनामा २.३ प्रतिशतले बढी हो। सन् २०२५ को जुलाईमा नेपाल भ्रमण गर्ने विदेशी पर्यटकको संख्या ७० हजार १९३ थियो।

यसपटकको तथ्यांकमा सबैभन्दा उल्लेखनीय पक्ष चिनियाँ पर्यटकको पुनरुत्थान बनेको छ। जुलाई महिनामा चीनबाट ११ हजार ९९ जना पर्यटक नेपाल आएका छन्, जुन अघिल्लो वर्षको तुलनामा ६१.०९ प्रतिशतले बढी हो। यो संख्या कोभिड–१९ महामारीअघि सन् २०१९ को जुलाईमा आएको १० हजार २१५ पर्यटकको स्तरसमेत पार गर्दै ८.६५ प्रतिशतले माथि पुगेको छ। यसले नेपालको पर्यटन बजारमा चीन पुनः बलियो स्रोत बजारका रूपमा फर्किएको संकेत गरेको छ।

यद्यपि, भारत अझै पनि नेपालको सबैभन्दा ठूलो पर्यटक स्रोत मुलुक बनेको छ। जुलाईमा भारतबाट २३ हजार ४९० पर्यटक नेपाल आएका छन्, जसले कुल विदेशी आगमनको ३२.७३ प्रतिशत हिस्सा ओगटेको छ। अमेरिकाबाट ७ हजार ७५४ पर्यटक आएर तेस्रो स्थान कायम रहँदा बंगलादेश (४ हजार १७९), बेलायत (३ हजार ७७३) र अस्ट्रेलिया (२ हजार ४२८) पनि प्रमुख स्रोत बजारका रूपमा देखिएका छन्।

क्षेत्रगत तस्वीर

दक्षिण एसियाली (सार्क) मुलुकबाट जुलाईमा २९ हजार ७५५ पर्यटक नेपाल आएका छन्। कुल आगमनमा यसको हिस्सा ४१.४६ प्रतिशत भए पनि अघिल्लो वर्षको तुलनामा यो बजार ११.९३ प्रतिशतले घटेको छ। भुटानबाट ९९१, पाकिस्तानबाट ४७५, श्रीलंकाबाट ५८१ र माल्दिभ्सबाट ३९ पर्यटक नेपाल आएका छन्।

यसविपरीत, दक्षिण एसियाबाहेकका अन्य एसियाली मुलुकबाट आउने पर्यटक उल्लेखनीय रूपमा बढेका छन्। जुलाईमा यी मुलुकबाट १७ हजार ४२४ पर्यटक नेपाल आएका छन्, जुन गत वर्षको तुलनामा ३३.०५ प्रतिशतको वृद्धि हो। चीनपछि दक्षिण कोरिया (१,३९४), मलेसिया (१,३८०), जापान (१,१११), भियतनाम (५७४), सिंगापुर र म्यानमार (समान ४३७) तथा थाइल्यान्ड (४२८) प्रमुख बजारका रूपमा देखिएका छन्।

युरोप र अमेरिकी बजारको स्थिर योगदान

युरोपबाट जुलाईमा ९ हजार २७९ पर्यटक नेपाल आएका छन्, जसले कुल आगमनको १२.९३ प्रतिशत हिस्सा ओगटेको छ। बेलायत, जर्मनी, स्पेन, फ्रान्स, नेदरल्यान्ड्स, पोर्चुगल र रूस प्रमुख युरोपेली स्रोत मुलुक रहेका छन्।

त्यसैगरी अमेरिकी महादेशबाट ८ हजार ८२४, ओसियानियाबाट २ हजार ६०७, मध्यपूर्वबाट ७३६ तथा अफ्रिकी मुलुकबाट ३२४ पर्यटक नेपाल आएका छन्।

पर्यटन उद्योगका लागि सकारात्मक संकेत

जुलाई महिनाको तथ्यांकले नेपालमा अन्तर्राष्ट्रिय पर्यटन क्रमशः पुनः सुदृढ बन्दै गएको देखाएको छ। विशेषगरी चिनियाँ बजारको तीव्र पुनरागमनले आगामी शरद् पर्यटन सिजनमा विदेशी आगमन अझ बढ्ने अपेक्षा गरिएको छ। पर्यटन व्यवसायीहरूका अनुसार चीनसहितका पूर्वी एसियाली बजारमा बढ्दो आकर्षणलाई लक्षित गरी हवाई पहुँच, प्रचार–प्रसार र पर्यटन पूर्वाधारमा थप लगानी गर्न सके नेपालको पर्यटन उद्योगले अझ ठूलो लाभ लिन सक्नेछ।