आठ सय केयरगिभर लिने भनेको इसराइलले अब २ हजार जनासम्म लैजाने, कसले पाउँछन् मौका ?
काठमाडौं । इसराइल सरकारले नेपालबाट २ हजार जनासम्म केयरगिभर लैजाने भएको छ ।
सोमबार श्रम, रोजगार तथा सामाजिक सुरक्षा मन्त्री शरतसिंह भण्डारी र नेपालका लागि इसराइली राजदूत हनान गोडरबीच भएको भेटवार्ताका क्रममा उक्त सहमति भएको हो ।
भेटमा दुईपक्षीय श्रम सम्बन्धमा विविध पक्षका साथै जी-टु-जी प्रक्रिया अन्तर्गत केयरगिभरमा नेपाली श्रमिक इसराइल पठाउन भइरहेको छनोट प्रक्रियाका बारेमा पनि छलफल भएको थियो ।
छनोटको चरणमा रहेका पाँच सय जना मुख्य उम्मेदवार र तीन सय जना वैकल्पिक उम्मेदवार गरी जम्मा आठ सय जना नेपाली श्रमिक इसराइल लैजाने भनिएको थियो । अब सो संख्या बढाएर १ हजार जना मुख्य उम्मेदवार र १ हजार जना वैकल्पिक उम्मेदवार गरी कुल २ हजार जनासम्म नेपाली लैजान सकिने गरी सहमति भएको मन्त्रालयले जनाएको छ।
साथै, आगामी दिनमा कृषि लगायत अन्य क्षेत्रमा समेत नेपाली श्रमिकहरू इसराइल लैजान सकिनेबारे पनि उक्त भेटमा छलफल भएको छ ।
