कलाकारहरूले प्रधानमन्त्रीलाई भने– भ्रष्टाचारविरूद्धको कारबाही र निर्वाचन यो सरकारको अर्जुनदृष्टि हुनुपर्छ
प्रधानमन्त्री निवास बालुवाटारमा बुधबार प्रधानमन्त्री सुशीला कार्कीले कलाकारहरूसँग छलफलपछि समूहिक तस्बिरमा । तस्बिर : प्रदीप राज वन्त/रासस
टुरिजमफेस
काठमाडौं । प्रधानमन्त्री सुशीला कार्कीले वर्तमान समयमा सबैको साथ आवश्यक भएको बताएकी छन् । प्रधानमन्त्री निवास बालुवाटारमा कलाकारहरूसँगको भेटमा उनले यस्तो बताएकी हुन् । ‘समाजमा तपाईं कलाकारहरूको प्रभाव छ, सामाजिक सञ्जालतिर भइरहेको दुष्प्रचार चिर्न तपाईंहरूले पनि भूमिका खेलिदिनुहोस्।
हाम्रा केही कमीकमजोरी भए पनि औंल्याइदिनुहोस्। तर असल नियतले काम गर्दागर्दै कसैले गाली गर्छ भने त्यस्ता गालीसँग डराउँदैनौं। हाम्रो उद्देश्य र लक्ष्यमा हामी स्पष्ट छौं,’ प्रधानमन्त्री कार्कीले भनिन् ।
कलाकारहरूले पनि प्रधानमन्त्री कार्कीलाई गलत सूचना र प्रोपागान्डाबाट नडराई संकल्प अनुसार अघि बढ्न सुझाव दिए । उनीहरूले भ्रष्टाचारविरूद्धको कारबाही र आगामी निर्वाचनलाई अर्जुनदृष्टि बनाएर अघि बढ्न प्रधानमन्त्रीलाई सुझाव दिए ।
‘सरकारसँग हामी केही माग्न आएका होइनौं। यो देश रहेमा माग्ने कुरा माग्दै गरौंला। पहिला यो देश बचोस्। यसका लागि सरकारले खुट्टा बलियो गरी टेकेर अघि बढोस्,’ कलाकारहरूले भने ।
मुलुकको पहिलो महिला प्रधानन्यायाधीशका रूपमा काम गरेपछि पनि कठिन परिस्थितिमा मुलुकको नेतृत्व सम्हालेकी भन्दै कलाकारहरूले प्रधानमन्त्री कार्कीप्रति कृतज्ञता पनि प्रकट गरे ।
‘अब के पो हुन्छ भनेर हामीलाई डर लागिरहेका बेला सम्हाल्न हजुर आउनुभएको छ,’ अभिनेत्री ऋचा शर्माले भनिन्, ’हामीलाई ढुक्क भएको छ। यहाँको सरल, सादगीपूर्ण र स्पष्टवक्ता शैलीका कारण पनि भरोसा जागेको छ। अब मुलुक सही दिशामा अघि बढ्नेमा हामीलाई विश्वास छ ।’
परिवर्तन नरूचाएका तत्वहरूले गृहमन्त्री ओमप्रकाश अर्यालसहित यो सरकारलाई विवादमा तान्न खोजेको उनीहरूको दाबी थियो। त्यसका लागि लागि सामाजिक सञ्जालमा भइरहेको दुष्प्रचारका विषयमा उनीहरूले चासो व्यक्त गरेका थिए ।
अभिनेता विपिन कार्कीले भने, ‘गृहमन्त्रीज्यूका केही दिनका अभिव्यक्तिले सरकार डराएको छैन भन्ने अनुभूति हामीलाई भएको छ । सरकारप्रति थप विश्वास र आशा जागेको छ। अझै सरकार दरिलो रहेछ भन्ने अनुभूति गर्न पाऊँ ।’
गृहमन्त्रीले कानुनको शासनका पक्षमा देखाएको अडान र विपद व्यवस्थापनमा खेलेको भूमिकाको सराहना गर्दै उनीहरूले देशमा सरकार छ भन्ने कुराको अनुभूति भएको बताए ।
अभिनेता निश्चल बस्नेतले भने, ‘आफू सही धरातलमा छु भन्ने लागेको छ भने कसैसँग डराउनुपर्दैन, ढुक्कसँग अघि बढ्नुहोस्। तपाईँको पक्षमा हामी छौं । देशलाई थप अप्ठ्यारो आउन नदिन यतिखेर राष्ट्रिय एकताको खाँचो छ। सरकारलाई सहयोगको खाँचो छ र यतिखेर सकारात्मकताको खाँचो छ ।’
साहित्य र कलाले आलोचनात्मक चेत बोक्ने भए पनि अहिले तटस्थ नागरिक सरकार रहेको र पूर्वप्रधानन्यायाधीशदेखि समाजका प्रतिष्ठित, विज्ञ, विशेषज्ञहरू मन्त्रिमण्डलमा सामेल भएका कारण पनि कम्तीमा विगतमा जस्तो बेथितिको संरक्षण हुने छैन भन्ने विश्वास पनि उनीहरूले व्यक्त गरे ।
संगीतकार कालीप्रसाद बाँस्कोटाले भने, ‘समाज भड्काउन सजिलो छ, सम्हाल्न गाह्रो छ। अहिले भड्काउन खोज्नेहरू बढी देखिएका छन्। त्यस्ता तत्वहरूप्रति सचेत रहँदै सम्हाल्ने र सम्हालिने समय हो यो ।’
वर्तमान सरकारलाई बदनाम र कमजोर बनाउँदै अस्थिरताको लाभ लिन खोज्नेहरूले नियोजित रूपमा चलाइरहेका अभियानलाई निस्तेज बनाउन जेनजी युवादेखि परिवर्तन पक्षधर सबै एक ठाउँमा उभिनुपर्ने आवश्यकता पनि उनीहरूले औंल्याए ।
त्यस अवसरमा कलाकार तथा सर्जकहरु विजय बराल, सुजित बिडारी, निश्चल बस्नेत, विपिन कार्की, शान बस्न्यात, दिव्यदेव पन्त, कालीप्रसाद बाँस्कोटा, ऋचा शर्मा, कर्म लगायतको उपस्थिति थियो । रासस
प्रधानमन्त्री निवास बालुवाटारमा बुधबार प्रधानमन्त्री सुशीला कार्कीले कलाकारहरूसँग छलफलपछि समूहिक तस्बिरमा । तस्बिर : प्रदीप राज वन्त/रासस
