दिल्लीकी मुख्यमन्त्री आतिशीले लिइन् शपथ, मन्त्रिपरिषद् पनि गठन
५ असोज, काठमाडौं । दिल्लीकी मुख्यमन्त्री आतिशी मार्लेनाले शपथ लिएकी छन् । शनिबार आतिशीले दिल्लीस्थित राज निवासमा आयोजित समारोहमा उपराज्यपाल भीके सक्सेनासामू पद तथा गोपनियताको शपथ लिएकी हुन् ।
दिल्लीका मुख्यमन्त्री अरविन्द केजरीवालले गत मंगलबार पदबाट राजीनामा दिएपछि आम आदमी पार्टीले आतिशीलाई नयाँ मुख्यमन्त्रीमा चयन गरेको थियो । उनी पार्टीको विधायक दलको बैठकबाट मुख्यमन्त्रीमा सर्वसम्मत भएकी थिइन् ।
आतिशी दिल्लीकी तेस्राे महिला मुख्यमन्त्री हुन् । यसअघि दिल्लीमा सुष्मा स्वराज र शिला दिक्षित मुख्यमन्त्री भएका थिए । ४३ वर्षीया अतिशी दिल्लीकी सबैभन्दा कम उमेरकी मुख्यमन्त्री समेत हुन् । यसअघि केजरीवाल ४५ वर्षको उमेरमा मुख्यमन्त्री भएका थिए ।
मुख्यमन्त्री केजरीवाल जेलमा रहेका बेला आतिशीले सरकारको मुख्य ‘पोर्टफोलियो’ सम्हालेकी थिइन् । शिक्षासमेत मुख्य विभाग सम्हालेकी आतिशीलाई केजरीवालको विश्वासपात्रका रूपमा हेरिन्छ ।
कथित दिल्ली मदिरा भ्रष्टाचार प्रकरणमा जेल परेका केजरीवाल सर्वोच्च अदालतको आदेशपछि रिहा भएलगत्तै राजीनामाको घाेषणा गरेका थिए । केजरीवालले आइतबार दिल्लीमा कार्यकर्तालाई सम्बोधन गर्दै दुई दिनभित्र राजीनामा दिने र जनताले ‘इमान्दारीको प्रमाणपत्र’ नदिएसम्म मुख्यमन्त्रीको पदमा नफर्कने बताएका थिए ।
भारतीय जनता पार्टी (भाजपा) ले भने केजरीवालको राजीनामालाई ‘प्रचारबाजी’ काे संज्ञा दिएको छ । दिल्लीमा आगामी फेब्रुअरीमा विधानसभा चुनाव हुँदै छ ।
